Shqipëria do të kërkojë sot prej orës 20:45 fitoren me Maqedoninë në Shkodër, në sfidën e saj të parë të eliminatoreve për pjesëmarrjen në finalet e Kampionatit Botëror të Futbollit, “Rusi 2018”.
Trajneri Gianni De Biasi gjatë këtyre ditëve provoi shumë skema në seancat stërvitore dhe duke ndryshuar vazhdimisht lojtarët titullarë. De Biasi gjithsesi gjatë konferencës së djeshme tha se nuk pritet të ketë shumë ndryshime në krahasim me atë të finaleve të Euro 2016.
“Besoj se nuk do të ndryshojë shumë sa i përket formacionit, mendoj se skuadra do të jetë e njëjtë si në Europian. E kemi studiuar kundërshtarin dhe do të aplikojmë ato që kemi bërë në stërvitje. Është e vërtetë që është larguar Cana, por kemi grumbulluar sërish Gjimshitin dhe kanë ardhur Hyka e Manaj”, shprehet Gianni De Biasi, trajner i Kombëtares.
Në formacion e sigurt është pjesa e prapavijës me Berishën nga minuta e parë në portë dhe në mbrojtje Hysajn, Gjimshitin, Mavrajn e Agollin.
Në sulm mendohet të niset me Sadikun i mbështetur nga një mesfushë e ngjeshur. Kjo do të jetë ndeshja e parë kualifikuese mes dy ekipeve dhe kuqezinjtë do të kërkojnë suksesin e parë pas 17 vitesh me përfaqësuesen maqedonase.
Kombëtarja do të mbështetet sonte nga rreth 15 mijë tifozë në takimin e parë, pas më shumë se 13 vitesh në Shkodër. Këto janë të dhënat e Federatës Shqiptare të Futbollit për interesimin për ndeshjen me Maqedoninë.
Gjatë orëve të paradites në sportelet e stadiumit “Loro Boriçi” gjen ende persona që kërkojnë ndonjë biletë të mbetur.
Me këtë interesim do të jenë të larta edhe masat sigurisë rreth 900 forca policore do të angazhohen për të mbikëqyrur stadiumin dhe zonën përreth tij ku nuk do të lejohet parkimi i automjeteve.
Hyrja e tifozëve në stadium do të nisë prej orës 17:00. Në rrugët e Shkodrës janë shfaqur edhe simbolet kombëtare me flamujt dhe shallet kuqezi. Atmosfera do të ndizet akoma më shumë me afrimin e orës së sfidës.
