Caktohet dita e beatifikimit të 38 Martirëve të kishës katolike

Tashmë është bërë edhe akti i fundit procedurial i lumnimit të martirëve të kishës katolike në Shqipëri, njoftimi për datën e ceremonisë së lumnimit dhe vendi ku do të mbahet.

Në njoftimin e publikuar sot nga Angelo Massafra, Arqipeshkëv Metropolit i Phkodër-Pult theksohet se kremtimi do të bëhet me 5 nëntor 2016 në Shkodër.

“Pas një kohe relativisht të gjatë, me një punë voluminoze dhe me angazhimin e palodhshëm për të arritur deri në përmbylljen e procesit kanonik, në njohjen dhe në pranimin zyrtar të dëshmisë flijuese për Fe dhe Atdhe, të Imzot Vinçens Prennushit dhe 37 Shokëve të tjerë, erdhi momenti që tani solemnisht të shpallim datën historike të Ritit të Lumnimit e të Naltimit në altar të 38 bijëve tanë. Procesi dioqezan i filluar me 10 nentor 2002 e mbyllur me 8 dhjetor 2010…u analizua nga ekspertet e Kongregatës për Çeshtjen e Shenjterve…dhe me dekretin që Papa Françesku firmos me 26 prill 2016 u dekretua se mund të shpallen të Lumë.

Më në fund, me letrën që Ati Shenjte, Papa Francesku na ka derguar përmes Sekretarisë së Shtetit të Vatikanit, na konfirmon se data e Kremtimit do të jetë 5 NENTOR 2016.

Vendi i kremtimit do të jetë: Sheshi i Katedralës së Shën Shtjefnit, Shkodër

Riti i Lumnimit do të udhehiqet nga Prefekti per Cështjen e Shenjtërve, Eminenca e tij Kardinal Angelo Amato.

Me këtë shpallje, kemi plotësuar të gjitha detajet e nevojshme. Tashmë, na takon neve që t’i naltojmë e të përgatitemi për t’i nderuar me festën tonë të hareshme shpirtërore. Si Arqipeshëvqë ka çuar përpara proçesin e Martirëve, me ekipin e gjyqit kishtar që falënderoj, si Arqipeshkëv i Vendit ku do të kremtohet Mesha e Lumnimit dhe në emër të Konferencës Ipeshkvore, Ju bëj thirrjen dhe ju nxis për të kremtuar sa më denjësisht këtë moment historik për Kishën dhe Kombin.

Zoti Ju bekoftë!”, shkruhet në njoftimin e Massafrës.

/DRONI.al/