Vilson Kilica, piktori perfekt i realizimit socialist prej dy ditësh ka ikur por duke lënë pas krijimtarinë e rrallë, tablotë që flasin sa romanet të periudhës së socializmit.
Kilica vdiq pas një sëmundje të rendë duke ikur bashkë me të edhe një prej piktorëve më në zë të Shqipërisë në shekullin e XX.
Krijues brenda një rryme hermetike, ai ia doli që të zëvëndësonte censurën me ngjyrat, barrierat me lëvizjet, të ngjallte pak optimizëm rural përmes një diktature që diktonte edhe penelat.
Kilica u përcoll me një ceremoni të thjeshtë familjare.
Disa nga tablotë më të njohura janë “Denoncimi i traktatit të Varshavës”, “Shpallja e Republikës” (1983), e ekspozuar në Galerinë Kombëtare të Arteve, që ka në qendër figurën e Enver Hoxhës dhe të tjera figura të rëndësishme të kohës (Omer Nishani, Baba Faja Martaneshi, Myslym Peza, Gogo Nushi…), “Punëtorët”, “U kthefsh me lirinë”, “Brigadieret” etj.
Piktori Vilson Kilica ka lindur në vitin 1932 në një familje patriotike në Fier. Në vitin 1949, nis Liceun Artistik “Jordan Misja”, nën drejtimin e piktorit Sadik Kaceli duke i përfunduar me medalje ari. Në vitin 1952 nis studimet në Akademinë e Arteve “I. E Rjepin” në Leningrad.
Ishte drejtori i parë i ILA-s, sot Universiteti i Arteve.
Rreth 40 tablo të tij ruhen dhe ekspozohen në Galerinë Kombëtare të Arteve, në Tiranë. Mbi 100 të tjera ndodhen në koleksione private në SHBA, Gjermani, Francë, Itali etj.
