Deputetit socialist, ish-nënkryetari i Parlamentit Namik Dokle fiton gjyqin me Kuvendin duke përfituar pagën e munguar, shpërblimet dhe dietat për një periudhë 9-mujore.
Vendimi në favor të deputetit është dhënë nga gjyqtari i gjykatës Administrative, Gentian Hamiti i cili i ka njohur Namik Dokles të drejtën për të përfituar afro 1.4 milionë lekë përfitime për periudhën shtator 2009 – maj 2010.
Sipas vendimit parlamenti duhet ti paguajë deputetit, pagën neto prej 780.243 lekë shpenzime telefonike në shumën 147.100 lekë, dieta në vlerën e 272.282 lekë si dhe shpenzime transporti në vlerën e 223.042 lekë.
Juristi i parlamentit në gjykatë sqaroi se konflikti financiar me deputetin ka ardhur si pasojë e bojkotit të plotë që Namik Dokle i ka bërë punës së Kuvendit duke mos marrë pjesë në seanca plenare, komisione parlamentare dhe veprimtarinë e parlamentit.
Por sipas gjykatës mandati i një deputeti dhe të drejtat e përfitimet që lindin prej mandatit nisin që ditën që Komisioni Qendror zgjedhor e shpall atë fitues.
Periudha shtator 2009 – maj 2010 përkon me protestën e Partisë Socialiste në atë periudhë në opozitës, e cila nën moton “Hap Kutitë” bojkotoi për disa muaj punimet e Kuvendit.
Në atë periudhë Kuvendi vendosi që jo vetëm deputetit Namik Dokle por plot 63 deputetëve të tjerë socialist t’i ndërpresë përfitimet financiare.
Namik Dokle nuk “i hapi kutitë” por fiton gjyqin dhe 14 milionë lekë nga Kuvendi
