Nishani: Drafti i reformës në drejtësi pengon hetimin e krimeve të komunizmit

Presidenti i Republikës, Bujar Nishani, nga Malësia e Madhe kërkoi hetimin e krimeve të komunizmit. Nishani tha se kjo është në interes të sigurisë kombëtare dhe kërkoi heqjen nga drafti i reformës në drejtësi të neneve që pengojnë hetimin e krimeve te kohës së diktaturës.
Presidenti Bujar Nishani shprehu keqardhje se në  proceset e reformave tentohet të bëhen provokime
Sa i takon hapjes së dosjeve, kreu i shtetit tha se ligji nuk ka filluar të zbatohet por ai nuk është i plotë “pa lustracionin”
“Jo retorikë hetimet e dënimet e krimeve të komunizmit dhe sigurimit të shtetit”, ishte mesazhi që përcolli kreu i  shtetit.
“E quaj të papranueshme hartimin dhe tendencën e një neni të tillë nga të ashtuquajturit ekspertë të reformës në drejtësi, për të vendosur në Kushtetutë një nen që ndalon njëherë e përgjithmonë hetimin e krimeve të komunizmit. Nga kjo tokë martirësh i bëj thirrje deputetëve të përgjegjshëm të Kuvendit të Shqipërisë që të mos e miratojnë këtë nen”, deklaroi Nishani.
Nishani ka marrë pjesë në aktivitetet për 71-vjetorin e lëvizjes anti-komuniste, pjesëtarët e të cilës presidenti i ka vlerësuar me Dekoratën e Artë të Shqiponjës. Nishani ka shpjeguar edhe mosdekretimin e ligjit të pronave dhe dërgimin e tij në Gjykatën Kushtetuese.
“Para pak ditësh të gjithë ne, shumë si ne, nuk do ta besonin që 2016 mund të vinte me një ligj të Parlamentit i cili do të kërkonte rikonfiskimin e pronave të shqiptarëve. Rikonfiskimi i pronave nuk mund të ndodhë dhe nuk do të ndodhë”, theksoi Nishani.  Presidenti vlerësoi kryengritjen e Malësisë së Madhe si ngjarje me vlera të paçmuara
“Kryengritja e Malësisë së Madhe nuk ishte rastësore. Revolta antikomuniste kërkon tabanin e vet dhe me mire se ketu nuk kishte ku të gjente. Nuk do te rresht sa të jem në këtë institucion t’i përkujtoj këto ngjarje të rëndësishme për vendin. Deri para pak ditesh askush nuk mendonte se pas 25 vitesh te rrezimit të regjimit të shihnim tentativa me kurajo të paimagjinueshme të na shfaqnin simbolet e asaj diktature. Askush nuk mendonte se mekanizmat e egra të vrasjes së shqiptarëve do te tentonin të provokonin sërish shqiptarët. Ju jeni këtu për të mos lejuar asnjë provokim të kësaj natyre. Krimet e komunizmit janë pa u hetuar dhe dënuar”, u shpreh Nishani.