Kryeministri Edi Rama është shprehur besimplotë se do të kalojë pengesat sa i takon reformës në drejtësi. Gjithashtu Rama tha se islamizmi radikal po përdor neglizhencën e BE-së në Ballkanin Perëndimor për axhendën e tyre.
Në fjalën e tij si lektori në Kolegjin e Europës në Bryzh, Belgjikë, Rama tha se, “Tani jemi në fazën e parë të finalizimit të reformës në drejtësi. Komisioni i Venecias është i pranuar nga të gjithë si një këshilltar mbi palët, ndaj jam besimplotë që do të kalojmë pengesat”.
Rama iu drejtua auditorit me temë “Të mbajmë gjallë Ëndrrën e Europës së Hapur”.
Kryeministri është ndalur dhe te nevoja e zgjerimit të BE-së me vendet e Ballkanit Perëndimor.
Procesi i integrimit është një mjet unik për një vend si Shqipëria dhe për ish vendet komuniste në përgjithësi, për t’u demokratizuar dhe modernizuar. Për këtë, u shpreh Kryeministri, nuk është çështja se kur do të mundemi të gjithë të vijmë në Bruksel, por se kur do të mundemi të jemi pjesë normale e familjes europiane, ndaj hapja e bisedimeve nuk përbën anëtarësi, nuk ka detyrime shtesë për BE, teksa për ne është thelbësore, bën të mundur mbajtjen e vendit dhe shoqërisë në rrugën e duhur.
“Sot, në BE haset fenomeni i ‘lodhjes nga zgjerimi’. Kjo ‘lodhje nga zgjerimi’ vë në rrezik fuqinë transformuese të BE-së mbi ‘europianizimin’ e vendeve të rajonit. ‘Lodhja nga zgjerimit’, gjithashtu, i jep hapësirë politikanëve nacionalistë dhe islamizmit radikal në Ballkanin Perëndimor, që përdor neglizhencën e BE-së në drejtim të Ballkanit Perëndimor për axhendën e tyre”, është shprehur më tej Edi Rama, sipas zyrës së shtypit të kryeministrisë
I pyetur sa ndikon atmosfera rreth myslimanëve sot në Europë në procesin e integrimit, Kryeministri theksoi se të tilla qëndrime lidhen më shumë me mosdijen dhe mungesën e njohurive mbi besimin fetar.
“Ne përballemi me një problem të madh, që lidhet me injorancën e brezit të ri apo të gjithëve ne bashkë, në lidhje me besimin fetar. Duhet të kuptojmë se rritja e partive anti-europiane bazohet shumë në këtë luftë dhe në injorancën e njerëzve që nuk dinë asgjë rreth islamit, kulturës, historisë së këtij besimi, ashtu si besimeve të tjera. Në Shqipëri, ne punojmë së bashku me disa partnerë dhe miq, për të ndërtuar një paketë të laicitetit dhe kulturës së besimeve dhe ta fusim këtë në shkollë, për t’i dhënë fëmijëve dhe të rinjve, mjetet për të kuptuar dhe për të pasur opinionin e tyre”.
Kryeministri u ndal edhe në atë që e quan paradoks, mosdhënien ende të së drejtës për lëvizjen e lirë të qytetarëve në Kosovë.
“Qytetarët në Kosovë, sot nuk mund të lëvizin të lirë, ndërsa ironikisht, në kohën kur ishin një komunitet i margjinalizuar në Jugosllavi, mund të lëviznin pa probleme. Ata janë shteti i vetëm në Europë që kanë ende nevojë për viza. Ky është një paradoks i tmerrshëm për ta. Kjo i bën të ndihen në kurth në shtetin e tyre të pavarur dhe kjo ngjan si një tradhti nga ana e Europës, në këndvështrimin e njerëzve të thjeshtë.”
Nëse para 10 vitesh, përfundoi Kryeministri, Ballkani ishte për Europën një pjesë e vogël e një tabloje shumë më të madhe, sot është në interesin e ndërsjellë që Ballkani të integrohet së më shpejt të jetë e mundur.
Rama: BE e lodhur nga zgjerimi
