Kryetari i komunës Bërzhitë, Genci Drita u arrestua në shtator të vitit 2014, por gjykata vendosi hetimin e tij në gjendje të lirë dhe u lirua. Më pas u dënua me 5 vjet burg, dënim i cili u la ën fuqi edhe nga Gjykata e Apelit.
Pas kësaj arrestimi i tij ishte i pashmangshëm. Sot ai u kap nga policia.
Korrupsioni
Prokuroria e Krimeve të rënda e ka hetuar Dritën për korrupsion pasiv. Hetimet nisën pas sinjalizimeve se një banori të Komunës së Bërzhitës i kërkohej para për t`i mundësuar dhënien e një lejeje për shfrytëzimin e një biznesi. Për të krye misionin e ndërmjetësit mësohet se ka ndërhyrë shefi i zyrës së Tatimeve të komunës,Armand Burri, i cili, në të gjitha bisedat që janë kryer mes palëve, ka pretenduar se 4500 euro duhej që t`i jepeshin kryetarit për të bërë të mundur marrjen e lejes. Atëherë, prokuroria ka nisur edhe punën për të verifikuar vërtetësinë e informacionit, ku edhe ka mbajtur nën vëzhgim palët. Policia ka ndërhyrë në momentin kur qytetari ka qenë duke dorëzuar shumën e kërkuar prej 4500 eurosh.
Atë ditë u arrestua Armand Burri, në cilësinë e ndërmjetësit, ndërsa është shoqëruar në polici edhe eprori i tij, Genci Drita. Kryekomunari sapo ka mbërritur në polici është njohur edhe me urdhrin e dalë nga Krimet e Rënda, ku për të ishte lëshuar urdhri i arrestit në kushtet e flagrancës.
Ndërkaq Genci Drita është gjobitur nga ILKDKP-ja për fshehje pasurie menjëherë pasi ai kishte marrë postin e kryekomunarit të Bërzhitës në vitin 2008. Genci Drita ka deklaruar si të ardhura vjetore shifrën prej 5.7 milionë lekësh vetëm si të ardhura nga qiraja e një objekti biznesi, ndërkohë që sipas të dhënave është edhe një prej personave me kreditë më të mëdha.
