Reshjet e dendura të shiut, janë pasuar me përmbytjet e para. Më problematike paraqitet situata në Lezhë.
Shirat e sotëm kanë goditur më shumë pjesën veriore dhe qendrore të vendit, ndërsa më mirë paraqitet situata në jug.
Situata sipas qarqeve
Në Rajonin Verior – Në akset e qarkut të Shkodrës ka pasur rënie gurësh e materialesh, si pasojë e reshjeve. Në të gjithë akset janë në gatishmëri mjete dhe punëtore që po bëjnë pastrimin e tyre. Nuk ka probleme për qarkullimin deri tani.
Reshjet e dendura të shiut kanë shkaktuara përmbytjet e para në lezhë, ndërkohë që gjatë orëve në vazhdim situata pritet të përkeqësohet. Aktualisht në Lezhë gjendja është e rëndë në Zadrime dhe në Zejmen. Në fshatin Spiten uji është futur në banesa. Përmbytje ka edhe në brendësi të qytetit, ku rrugë e lagje të mbuluara nga uji.
Reshje e dëmtime ka pasur edhe në Bulqizë, ku përroi ka dalë nga shtrati dhe bllokoi rrugën
Përroi i dalë nga shtrati ka dëmtuar 2 kilometra rrugë në dalje të Bulqizës, ndërkohë që dy banesa janë dëmtuar pak. Sipas Shtabi të Emergjencave situata nuk është e rëndë, megjithatë nëse reshjet vazhdojnë me intensitet, do të ketë përkeqësim të saj.
Në Rajonin Qendror – Si pasoje e reshjeve ka pasur një dëmtim të rrugës në qarkun e Tiranës, saktësisht tek Ura e Peshkatarit – Bërzhitë, deri në gjysmën e korsisë. Janë marrë masat me vendosjen e sinjalistikës përkatëse.
Edhe në aksin Qafë Priskë – Shëngjergj ka një dëmtim të mbrojtëses prej betoni të rrugës, që ka sjellë dëmtim të saj. Është ngritur grupi i punës për verifikimin në vend të situatës. Rekomandohet të bëhet kujdes në qarkullimin në akset që kanë probleme dhe të respektohet sinjalistika e vendosur.
Situata e rënduar meteorologjike kanë bërë që prefekti i Qarkut të Elbasanit të mbledhë Shtabin e Emergjencave Civile për të koordinuar veprimet në rast të situatave kritike.
Raportohet se situatë e rënduar është në disa shkolla 9-vjeçare të Librazhdit dhe në fshatrat Qukës dhe Gurakuq. Probleme në rrethin e Librazhdit ka pasur edhe me furnizimin me energji elektrike.
Në Rajonin Jugor – Në akset e qarkut të Gjirokastrës nuk ka probleme deri tani. Në gatishmëri janë mjete e punëtore sidomos në zonat e njohura të rrëshqitjeve, siç janë Shkalla e Zezë, Rapi i Kuqarit etj. Janë marrë masa që në këto zona të instalohen mjete dhe njerëz në gatishmëri.
Në akset e Korçës nuk ka probleme për qarkullimin. Kontraktorët janë në gatishmëri.
