Kërcënojnë operatorët urban: Nga 1 janari 2016 ndërpresim transportin publik për Tiranën

“Nga 1 janari 2016, nuk do të ketë shërbim të transport publik për Tiranën” .
Ultimatumi është bërë sot nga drejtuesit e shoqatës ë Transportit Publik të Tiranës, në përfundim të takimit me nënkryetarin e bashkisë së kryeqytetit, Arbër Mazniku.
Nga ana e tij, Arbër Mazniku ka mohuar kategorikisht diskutimin për rritjen e çmimit të biletës. Për Maznikun, “as çmimi 50 lekë i biletës nuk është pjesë e dikutimit. Ndërsa po diskutohet për gjetje të zgjidhjeve alternative”, u shpreh nënkryetari i bashkisë së Tiranës.

Operatorët
Sipas drejtuesve të operatorëve të shërbimit urban, mësohet se “me baskinë u diskutua çdo gjë sot për shërbimin urban, por ende jo për çmimin e biletës. Diskutuam për përmirësimin e shërbimit, deri edhe për futjen e biletës elektronike. Nuk mund të vazhdojmë dot më, jemi në gjendje të rëndë ekonomike”, u shpreh njëri prej përfaqësuesve.
“Kemi hedhur nga 2 -3 milionë euro investime. Kemi autobusët me moshë mesatare më të re në Europë. Po të kishte fuqi bashkia, ti mbante vetë linjat e shërbimit urban. Ndërkohë kemi 4 -5 muaj pa ju dhënë pagat shoferët, lëre faturinot. Kemi marrë kredi, bankat na kërkojnë detyrimet. Po na rrënohet biznesi”, u shpreh Ferdinand Ibrahimi, një tjetër drejtues i një tjetër operatori i shërbimit urban.
“Sot nuk u morëm vesh. Në 1 janar nuk do ketë transport publik për Tiranën. Nuk mund të ketë negociata fikse për çmimin e biletës, por ai është pjesë e diskutimit, pas rinovimit të flotave të autobusëve”, u shpreh një tjetër drejtues operator.

Bashkia
Ka reaguar edhe bashkia e Tiranës për problemin e çmimit të biletës së shërbimit urban.
Nënkryetari Arbër Mazniku pranoi se “situata është e rëndë. Por një gjë është e qartë, bileta 70 lekë nuk është e mundur, rritja e çmimit të biletës dhe e aboneve për studentët, në këtë kohë është e pamundur”.
Për Maznikun, pjesë e diskutimit të sotëm ka qenë “një tjetër problem, cilësia e shërbimit. Diskutuam që pas zgjerimit të Tiranës, të mbulohen me shërbim të gjitha zonat si edhe të përmirësohet cilësia dhe frekuencat e shërbimit”.
Nënkryetari i bashkisë pranoi se negociatat vazhdojnë, por mohoi kategorikisht rritjen e çmimit të biletës. Për Maznikun as çmimi 50 lekë nuk është pjesë e diskutimit.
“Nesër kemi një tjetër takim negociues. Paralajmërimin e operatorëve për ndërprerjen e shërbimit në 1 janar, më tepër se kërcënim e shoh si një situatë e vështirë financiare e tyre. Rritja e çmimit të biletës nuk është pjesë diskutimi. Nuk është vullneti ynë të rikthehet shërbimi urban, nën administrimin e bashkisë. As rritja e biletës 50 lekë, nuk është pjesë diskutimi, jemi në kërkim të gjetjes së zgjidhjeve alternative, por jo rritje të çmimit të biletës”, përfundoi Mazniku.

/DRONI.al/