Ish-kryetari i Partisë Demokratike, Eduard Selami, deklaroi në një aktivitet kushtuar 25 vjetorit të protestave që përmbysën komunizmin në Shqipëri se nuk ka merita personale në atë revolucion. Sipas tij qytetarët janë ata që e kryen atë përmbysje.
“Askush nuk duhet të marrë merita personale për atë që ndodhi në vitet ’90, me protestat, revoltën dhe reagimin qytetar. Ishin qytetarët ata të cilët i dhanë goditjen sistemit në një kohë kur paralelisht po rrëzoheshin të gjitha regjimet komuniste. Siç tentojmë të marrim meritat për ato zhvillime, duhet edhe të ndajmë përgjegjësinë për faktin se edhe pasi kanë kaluar 25 vite, nuk mundëm të realizojmë atë që shumë nga ne besuan. Nuk arritëm të ndërtonim një vend me demokraci të zhvilluar”, tha Selami gjatë ceremonisë së hapjes së ekspozitës fotografike “Thirrja për liri”.
Në vijim Selami ka qënë kritik me ecjen e Shqipërisë përgjatë demokracisë. Duke ironizuar me sloganin “Drejtimi i duhur” të PS-së ai tha se “Shqipëria është në rrugën e drejtë, por jo në drejtimin e duhur. Është në drejtimin e gabuar, sepse nuk ka krijuar institucione”.
Ishkryetari i hershëm i PD-së në vitet 1992-1994 nuk la pa komentuar edhe situatën brenda PD-së. “Kam një lajm të keq për ata që janë të përqendruar te një ‘luftë’ brezash. Një lufte mes të rinjve dhe të vjetërve. Konrad Adenauer ishte 74 vjeç, kur u zgjodh për herë të parë si kancelar i Gjermaninë, në vitin 1949, dhe qëndroi aty për 14 vjet. Ndaj mosha nuk është asnjëherë avantazh apo disavantash brenda një force politike”, tha Eduard Selami, një prej drejtuesve të protestave studentore të vitit 1990.
