“Milionat që OSHEE ka dhënë për deputetë të Edi Ramës, kandidatë për kryetarë bashkie apo donator të Partisë Socialiste apo LSI-së, kryesisht janë ndarë me negociim pa shpallje gare. Me porosi; hajde dhe merr nga thesi ca miliona”.
Kështu ka deklaruar sot midis të tjerave nënkryetari i PD-së, Edmond Spaho, duke vijuar denoncimet për aferat e dyshimta korruptive të OSHEE-së.
Sipas Spahos, kjo kompani kështu funksionon për dy vite, duke shpërdoruar gjakun e shqiptarëve, ndërsa lihen në errësirë e futen në burg, të pamundurit.
“Kështu ka funksionuar për dy vite OSHE-ja, e cila shpërdoron milionat e gjakut të shqiptarëve, paratë qe i ka mbledhur me dhunë, me forcë, me burg. Majmen njerëzit e Edi Ramës me paratë që u morën jetën Qamil Zelës, Llazi Nasit, Gjovalin Lazrit, Arif Dodës. Bëjnë pasuri me këto miliona deputetë dhe klientela e Edi Ramës, teksa lihen në errësirë fëmijë të porsalindur, pleq të vetmuar, dhe çohen në burg njerëzit e pamundur. Për çfarë duheshin marrë me dhunë këto para kur nuk investohet ne përmirësimin e furnizimit me energji e evidentuar te hidrovorët që nuk punonin gjatë përmbytjeve apo te ndërprerja e vazhdueshme e dritave kudo në vend”, vijon Spaho.
Më tej, nënkryetari i PD-së, njëherazi edhe nënkryetari i Kuvendit, duke u ndalur në emra konkretë, ka renditur edhe shumat që sipas tij, kanë përfituar, ndërtuesi i vilës së Edi Ramës, apo edhe deputetë e ministra të PS-së.
“Këto para u duheshin marrë me dhunë qytetarëve që ndërtuesi i sarajeve të Edi Ramës të kapte 5 miliardë lekë për rikonstruksion zyrash. Sipas llogarive të bëra, ndërtuesit të Ramës i janë dhënë para për të bërë punime rregulluese që shkojnë 1639 euro metri katrorë. Ndërkohë që për të ndërtuar një godinë të re kostoja është 4 herë më e vogël. Këto para u duheshin marrë me dhunë qytetarëve që të merrte pa tender Safet-kandidati i Edi Ramës në Kamëz, 850 milionë lekë për shërbimin e ruajtjes dhe sigurisë fizike sikurse mori edhe kompania e Pjerin Ndreut, 340 milionë lekë. Kur ndahet torta nuk mungon i kudondodhuri i korrupsionit, Ilir Beqa, me kompaninë e tij Intech plus, që ngjeu lugën edhe me paratë e OSHE-së. 970 milionë lekë ka përfituar Sadri Abazi, një tjetër kanakar i Edi Ramës. Një lukuni donatorësh, deputetësh, miqsh të Edi Ramës janë sulur e kanë mbushur xhepat me paratë e shqiptarëve, pa tender, pa garë, me negociim nëse ju mjaftojnë për tu ngopur ose jo. Si hienat merr, shqyej, mbush trastën e ik”, ka shtuar nënkryetari i PD-së.
Sërish Spaho ka ripërsëritur thirrjen për të ndalur zullumqarët.
“Kjo është banda e OSHE, këto janë arritjet e mëdha të Edi Ramës. Një korrupsion i pamasë e i pështirë qe tallet me skamjen dhe me jetën e qytetarëve të vendit. Është koha për t’i ndalur zullumqarët e zhytur në vjedhje e zhvatje”, ka përfunduar Edmond Spaho.
OSHEE për klientelën e Edi Ramës: Hajde dhe merrni nga thesi ca miliona
