Shkelqim Cani, një shteg tjetër për biznesin e vogël deri më 31 dhjetor

Ministri i financave Shkëlqim Cani u kërkoi sot të gjitha bizneseve të rregjistrojnë mallrat deri më 31 dhjetor 2015 në mënyrë që ti hiqet penaliteti. Sipas tij operacioni kundër informalitetit ka gjetur me shkelje 10 % e bizneseve ndërkohë që nuk është kontrolluar ende gjysma.

“Të gjithë tatim paguesit që kanë gjendje mallrash pa faturë të cilat ata e ribëjnë deklaratën deri më 31 dhjetor 2015, u hiqet penaliteti dhe ndjekja penale”, tha Cani. “ Ajo që dua të theksoj është fakti që është gjoba 500 mijë lekë për ata që nuk deklarojnë numrin e saktë të punësuarve dhe kur nuk deklarojnë pagën reale të të punësuarve. Kryesorja këtu është që ata të mos qëndrojnë në atë gjendje “skllavërie”, apo pa pensione”, tha ministri ai.

“Nga 1 gushti deri më 24 shtator janë regjistruar 19 mijë biznese të reja”, tha ministri duke shtuar gjithashtu se është shtuar numri i bizneseve të cilët janë pajisur me kasë fiskale “Të regjistruar gjatë 25 ditëve të muajit shtator janë mbi 60 mijë punonjës të rinj”, deklaroi Cani.

Për punonjësit e administratës tatimore dhe doganore do të ketë dy vepra penale, ajo e deformimit të pasqyrave financiare, dhe e dyta punonjësit e tatimeve dhe dogana nuk duhet të kenë në pronësi qëndër kontabiliteti apo agjenci doganore.

“Një është që quhet vepër e rëndë penale, deformimi i pasqyrave financiare, bashkëpunimi për shkeljen e ligjit për punonjësit e administratës tatimore. Dhe së dyti, punonjësi i administratës tatimore, nuk lejohet që të ketë në pronësi qendra kontabiliteti dhe konsulence. Ai i administratës doganore nuk mund të ketë agjenci doganore”, tha ministri.

Ndërsa duke folur për skanimin në dogana, ministri tha se tashmë vendosja e taksës është sanksionuar me ligj, edhe pse janë vërejtur disa probleme teknike. “E dimë që biznesi ka shqetësime kontrata e vjetër ishte e njohur, të gjithë e dinin që në nuk donim..Pala tjetër na çoi në arbitrazh, sugjerimet na thanë se e keni të vështirë të fitoni në arbitrazh dhe rinegociuam.Ishte e papranueshme që ne të rishikonim gjithë kontratën, siç ishte çmimi nga 39 ne e ulëm në 22 euro. Kjo shumë duhet paguar pavarësisht se kalon apo jo në një pikë doganore ku ka apo jo skanim.. Ka disa probleme teknike..do ti bëjmë disa rregullime për të shmangur problemet teknike. Shpresoj ketë të mërkurë qeveria të kalojë ndryshimet”,-tha Cani.

Sipas ministrit, skanimi me Rapiscan nuk rrezikon popullatën. “Nuk ka asnjë risk nga skanimi, kemi të gjitha dokumentet që s’ka asnjë dëm për popullatën”, deklaroi ministri Cani

/DRONI.al/