Ka nisur vlerësimi i masave të arrestit për të prangosurit në flagrancë për ngjarjen e 5 shtatorit në Laç, mes tyre edhe deputeti Armando Prenga.
Seancat gjyqësore për masat e sigurisë zhvillohen me dyer të mbyllura (pa praninë e medias) ndërsa i pari që çeli këtë proces ishte Gjergj Cali.
“Më qëlluan brenda në oborrin e policisë”, mësohet të ketë thënë Cali, i cili akuzon drejtpërdrejtë deputetin Prenga si personin që e ka dhunuar.
Gjergj Cali i cili mbeti i plagosur nga përleshja, dhe që është lënë në “arrest në burg” nga gjykata, tha sot, se natën e konfliktit njoftoi policinë në numrin 129 pasi anëtarët e fisit të tij janë ndjerë të kërcënuar nga deputeti i qarkut të Lezhës Armando Prenga, telefonatë kjo e bërë para së të niste përleshja pranë komisariatit të Kurbinit ku u përdor edhe arma.
“Më tej, mësohet të jetë shprehur Gjergj Cali, njoftova shefin e komisariatit te Lezhes dhe nga frika telefonave edhe ministrin e Punëve të Brendshme Saimir Tahiri. Sipas dëshmisë së tij, ministri i ka dhënë garanci se ‘gjithçka është në rregull’. Edhe pse Tahiri na dha garanci, ne na vranë para policisë”, cituan burimet fjalët e Calit.
Pas tij pritet që në Gjykatën e Lartë rreth orës 12:00 të mbërrijë edhe deputeti Prenga, i cili dyshohet se është përfshirë në përleshjen me anëtarët e fisit Cali, sherr ky i nisur kohë më parë për tenderin që i jep vëllait të Prengës të drejtën e peshkimit në Lagunën e Patokut.
Më tej në seancat e tjera do të vendoset masa e sigurisë edhe për të arrestuarit e tjerë Anton Leka, Gazmir Jushi dhe Gjok Cali.
Cali në Gjykatë: Natën e krimit komunikuam dhe morëm garanci nga Tahiri, por na ‘vranë’ në oborrin e policisë
