Prokuroria e Krimeve të Rënda ka ngritur dyshime se paratë që siguroheshin nga trafiku i drogës Shqipëri-Itali nga dy familjet Lamaj dhe Ahmetaj janë investuar në hotele dhe bar-restorante në bregdetin e Vlorës. Sipas të dhënave hetimore të zbuluara në mënyrë operative nga prokuroria, mësohet se dy familjet e përfshira në trafikun e drogës kanë në pronësi një hotel luksoz dhe disa bar-restorante.
Grupi që trafikonte drogë, u zbulua më 24 gusht, ndërsa policia shqiptare ishte njoftuar që në prill. Nga operacioni i përbashkët policor u arrestuan 14 shtetasit shqiptar dhe nga përgjimet telefonike, “biznesi i drogës”kontrollohej nga dy familjet Lamaj dhe Ahmetaj, ndërsa të përfshirë ishin dhe dy efekticë policie, njëri prej të cilëve, Vladimir Zanaj që ishte garanti i trafikut të drogës.
Të 14 personat e arrestuar do të gjykohen në Shqipëri, edhe pjesa e të arrestuarve në Itali, ndonëse ende nuk ka një vendim për shqiptarët e arrestuar nga policia italiane pasi ka nisur gjykimi ndaj tyre për trafik dhe shpërndarje droge, vjedhje banesash etj.
