Kryeministri Edi Rama po poston prej disa ditësh të dhëna lidhur me të ardhurat duke i krahasuar ato me gjysmën e parë të vitit 2013. Pasdite ai ka postuar të ardhurat nga tatimet dhe doganat përgjatë muajve prill-korrik gjatë viteve 2013-2015 me shënimin: “Shikojini pak të ardhurat nga tatimet e doganat krahasuar me ç’mblidhej në kohën e atyre që sot bërtasin ku kanë shkuar paratë!”.
Një ditë më parë ai postoi edhe të dhëna të tjera mbi të ardhurat që krahasohen sërish me muajt e parë të 2013, duke mos e shtrirë krahasimin në të paktën dy vitet e fundit të qeverisjes së djathtë, 2011 dhe 2012.
Rama krahason me 2013 pikërisht në muajt ku vendi përfshihet nga fushata elektorale dhe tradicionalisht ulen të ardhurat në dogana dhe tatime. Në qershor të 2013 u bënë zgjedhjet. Por ndërkaq vitet elektorale në Shqipëri kanë shënuar vazhdimisht rënie të të ardhurave. Sic mësohet nga një raport i ministrisë së Financave në 5 muajt e parë të vitit 2013 kishte rënie të theksuar të të ardhurave në krahasim më 2012. “Të ardhurat nga tatimet dhe doganat ishin në nivelin 88.1 miliardë lekë, ose rreth -6.6 miliardë lekë më pak nga rreth 94.8 të parashikuara për periudhën, dhe -3.2 përqind më pak krahasuar me 5 mujorin e një viti më parë, baraz me 2.8 miliarde leke ne vlere absolute; të ardhurat nga pushteti vendor arritën në 5 miliardë lekë nga 5.7 miliardë lekë të parashikuara për këtë periudhë dhe me rënie vjetore te ndjeshme prej -12.4 përqind”.
Po në fund të vitit 2012 dhe në fillim të vitit 2013, qeveria e atëhershme mori disa vendime me efekt negativ në mbledhjen e të ardhurave. Ato ishin perjashtimi nga TVSH per makineri dhe pajisje; pergjysmimi i takses mbi automjetet e përdorura; ndryshimi i struktures se tatimit mbi pagat, duke rritur pragun e perjashtimit ne 30 000 leke; heqja e tatimit mbi token bujqesore. Masa të tilla japin efekt pozitiv për ekonominë pas një periudhë më shumë se një vit të zbatimit të tyre.
