Shqiptarët ulin konsumin e mallrave shtojnë kursimet “për ditët të këqija”

Konsumi privat regjistroi rënie vjetore me 1.2 % në tremujorin e parë të vitit 2015, duke reflektuar zhvendosjen e burimeve financiare drejt pagimit të faturave të prapambetura të energjisë elektrike, por edhe prirjen e konsumatorëve për të kursyer, njoftoi Banka e Shqipërisë në analizën e fundit për zhvillimet ekonomike ne vend.
Sipas Bankës, burimet e financimit të konsumit privat u mbështetën nga rritja e remitancave dhe e kredisë konsumatore. Ndarja më e detajuar e treguesve afatshkurtër dhe e vlerës së shtuar sipas sektorëve mundëson vlerësimin e konsumit familjar sipas grupeve kryesore të klasifikimit.
Rënia e konsumit u reflektua në masën më të madhe në tkurrjen e shpenzimeve konsumatore për mallrat e qëndrueshëm. Nga ana tjetër, shpenzimet për mallra për përdorim afatshkurtër dhe për shërbime janë rritur.
Bazuar në rezultatet e rubrikës së veçantë të vrojtimit të besimit konsumator për tremujorin e dytë të vitit, arsyet kryesore të kursimit ishin pasiguria për të ardhmen dhe zhvendosja e konsumit në një kohë më të vonë.
Më konkretisht, 46 % e konsumatorëve të pyetur kursejnë për të pasur fonde në dispozicion për të papritura dhe 39 % për të konsumuar në të ardhmen.
Treguesit afatshkurtër të konsumit privat sugjerojnë kontribut të ulët por pozitiv në rritjen e kërkesës agregate në tremujorin e dytë. Përmirësimi i besimit të konsumatorëve dhe i besimit në sektorin e shërbimeve sugjeron rritje të shpenzimeve konsumatore në tremujorin e dytë.
Konsumi privat klasifikohet në 4 kategori sipas jetëgjatësisë dhe qëllimit të përdorimit:
(i) mallra të qëndrueshme, të cilat përfshijnë mallra që mund të përdoren mbi 3 vjet (si për shembull mobilie, elektro-shtëpiake, vetura etj),
(ii) mallra gjysmë të qëndrueshme të cilat mund të përdoren nga 1 deri në 3 vjet (veshje, këpucë etj),
(iii) mallra jo të qëndrueshme të cilat kanë një kohë të shkurtër përdorimi, zakonisht më pak se 1 vit (ushqime, karburant, energji etj.) dhe
(iv) shërbimet.

/DRONI.al/