Sipas ekspertëve të ekonomisë, nuk është kriza greke ajo që do të ndikojë në ngadalësimin e rritjes ekonomike për 6-mujorin e dytë të vitit. Sipas tyre, janë faktorët e brendshëm që do të ndikojnë negativisht, dhe konkretisht, mungesa e harmonizimit nga ana e qeverisë të politikave financiare, fiskale e monetare.
Eksperti i ekonomisë, Zef Preçi, thotë: “
Në këto kushte faktorët që përkeqësojnë ekonominë janë të brendshëm. Mosrealizimin e të ardhurave e shoh në performancën fiskale, në mungesën e kapaciteteve menaxheriale, si qendror dhe të degëve në tatime, apo të influencës së lobeve të biznesit me politikën. Nuk besoj që sot gjendjen taksambledhës që do të guxonin të penalizonin biznese të mëdha të deputetëve. Edhe ndryshimi i taksave gjatë kësaj periudhe ka ndikuar negativisht duke ngushtuar mundësinë e zgjerimit të konsumit”.
Kështu eksperti, shprehet skeptik në arritjen e objektivave të qeverisë duke qenë e detyruar të rishikojë buxhetin, pasi ka shumë gjasa që borxhi publik të rritet.
Ekspertët këshillojnë si zgjidhje të situatës ekonomike në vend, harmonizim sa më i mirë të politikave ekonomike, fiskale e monetare, që mund të arrihet përmes përmirësimit të performancës fiskale, rritjes së investimeve publike e private si dhe një mbështetje më të fortë ndaj biznesit.
