BILANCI DËSHTIMIT/ Tatimet, në dy vjet mungojnë 122 milionë dollarë, burgosjet dhe procedimet nuk përmirësojnë situatën

Brenda dy viteve buxhetit të shtetit i kanë munguar rreth 122 milion dollarë si pasojë e krijimit të skemave mashtruese dhe evazioni fiskal.
Të dhënat e drejtorisë së Tatimeve tregojnë se vetëm për pjesën e parë të këtij viti në arkën e shtetit nuk janë arkëtuar 20 milionë dollarë vetëm si rezultat i skemave mashtruese kryesisht me TVSH-në një zë që ka pasur mosrealizim të ndjeshëm gjatë 6-mujorit të parë të 2015.
Nisur nga këto abuzime Drejtoria e Tatimeve ka referuar në prokuroritë e rretheve gjyqësore 247 çështje penale me vlerë dëmi 122 milionë dollarë me 456 autorë.
Ndërkohë që kanë përfunduar në pranga 60 të akuzuar për krijimin e skemave mashtruese fshehjen e të ardhurave dhe mos pagesë të taksave.
Administratat tatimore së bashku me prokurorinë po punojnë për zbardhjen e skemave dhe kalimin e tyre në Gjykatë në një kohë që vetëm për vitin 2015 janë referuar 85 çështje penale.
Ekspertët por edhe vetë bizneset kanë ngritur si shqetësim evazionin fiskal në administratën tatimore duke e lidhur këtë me rritjen e taksave.
Duke marrë shkas nga ulja e të ardhurave sidomos nga administrata tatimore ekspertët kërkojnë më shumë mirëmenaxhim ndërsa bizneset kërkojnë ulje të nivelit të taksave.