Mbrëmë nga ana e Interpol Tirana u krye ekstradimi nga Berlini/Gjermani, drejt vendit tonë i 44-vjeçarit shqiptar, Dritan Brisku, banues në Kuçovë-Berat.
Gjykata e Apelit Tiranë, me vendimin Nr. 922, datë 20. 10. 2014, e ka dënuar Dritan Briskun, me 2 vjet burg, për kryerjen e veprës penale të “Heqje e paligjshme e lirisë së personit“, parashikuar nga neni 110 i Kodit Penal të Republikës së Shqipërisë
Ngjarja për të cilën akuzohet dhe është dënuar 44-vjeçari, e ka zanafillën më se dy vjet më parë.
Më datën 20 mars 2013, pas një marrëveshje për transportimin e një sasie të madhe parash britanike (Paund) nga Londra për Tiranë, midis Dritan Briskut, me drejtuesin e mjetit E. M., i cili në shkëmbim të shumës prej 6.000 Euro dhe makinës që do ta kalonte në pronësinë e tij pasi të sillte në destinacion, ngarkesën në Tiranë, u akuzua nga Dritan Brisku dhe shokët e tij, se shtetasi E. M., i kishte përvetësuar një sasi të madhe valute në Paund.
Si masë shtrënguese për të nxjerrë të vërtetën ata e kanë marrë këtë të fundit dhe e kanë dhunuar për t`i kthyer paratë e dhëna, ku si rezultat shtetasi E. M., ka përfunduar pa ndjenja në shtëpinë e këtyre të fundit në rrugën Komuna e Parisit, në Tiranë.
Pas kësaj ngjarje si dhe pas gjykimit në mungesë të të akuzuarit, si rezultat i bashkëpunimit të Interpol Tiranës me Interpol Wiesbaden, Gjermani në datën 10 qershor 2015, Dritan Brisku, është arrestuar në Gjermani, nga autoritetet policore gjermane me qëllim ekstradimi në vendin tonë.
Ekstradohet nga Gjermania pengmarrësi i transportuesit të parave
