Çmimi i karburanteve në vendin tonë njeh vetëm rritje, duke mos reflektuar rënien në bursat ndërkombëtare. Një litër naftë në pikat e karburanteve shitet me 187 lekë për litër, 3 lekë më shtrenjtë nga sa ishte para disa ditësh. Ndërsa në harkun kohor të disa muajve çmimi ka lëvizur me thuajse 23 lekë për litër, duke kapur një çmim rekord.
Edhe çmimi i benzinës mbetet në kuota të larta, ku një litër shitet 183 lekë për litër. Me këto çmime Shqipëria kalon edhe disa vende të rajonit që ruajnë me fanatizëm një politikë të kostove të ulëta në transport.
Shoqata e hidrokarburente thotë janë disa faktorë që kanë ndikuar në rritjen e çmimit të karburanteve dhe që lidhen me faktorë të jashtëm. Sipas saj kriza greke ka bllokuar furnizimin e rajonit nga Greqia duke ndikuar në rritjen e kostos për transportin e kompanive të naftës.
Një tjetër arsye e rritjes së çmimit të karburantit është edhe shtrenjtimi i monedhës amerikane. Në tregun e brendshëm, një dollar u ble me 125. 3 lekë dhe u shit me 125.8 lekë.
Sipas grosistëve stabilizimi i tregut ndërkombetar dhe gjendja në shtetin fqinj mund të sjellë një ulje të çmimit të naftës e cila pritet të reflektohet në ditët në vijim.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
