Revista Euromoney vlerësoi për të katërtën herë rradhazi Bankën Kombëtare Tregtare, si “Banka më të mirë në Shqipëri për vitin 2015”. Çmimi iu dorëzua Kryetarit të Bordit Drejtues të Bankës, Z. Mehmet Usta, në mbrëmjen gala të zhvilluar në Londër më 9 Korrik 2015.
Gjatë ceremonisë Kryetari i Bordit Drejtues të Bankës Z. Usta theksoi se: “Edhe njëherë BKT ka dëshmuar se është Banka Më e Mirë në Shqipëri. Ne jemi lider në Shqipëri në të gjithë treguesit kryesor si asetet, fitimi, kapitali, depozitat dhe kreditimi individual, dhe jemi të gatshëm të tregojmë të njëjtën histori suksesi edhe në rajon. Sekreti i suksesit tonë qëndron në kuptimin e plotë e të thellë të Shqipërisë, njerëzve të saj dhe nevojave të tyre.”
Euromoney është një nga revistat financiare më të rëndësishme në botë. Për më shumë se 20 vjet, revista vlerëson sistemet bankare dhe tregjet e aseteve globale. Vlerësimi për të katërtin vit rradhazi i BKT si “Banka më e Mirë në Shqipëri”, konfirmon pozicionin e saj si bankë novatore, financiarisht e fortë dhe lider në sektorin bankar shqiptar.
Çmimi vjen menjëherë pas vlerësimeve të ngjashme nga dy revista të tjera prestigjioze, The Banker dhe EMEA Finance, të cilat vlerësuan BKT si Banka më e Mirë në Shqipëri.
BKT ka një total asetesh prej 2.6 miliard dollarë dhe 2 miliard dollarë depozita. E themeluar në 1925, BKT është banka më e vjetër tregtare në vend, me një rrjet prej 89 degësh, 63 prej të cilave ndodhen në Shqipëri dhe 26 në Kosovë.
