Dy drejtorë janë shkarkuar sot në Vlorë. Kështu, nga detyra e drejtoreshës Rajonale të Arsimit, në Vlorë, është shkarkuar Albana Hodaj dhe në vendin se saj është emëruar Vilma Bello.
Mësohet se këto ndryshime lidhen me konfigurimin e ri të forcave politike, të koalicionit qeverisës, konkretisht me kënaqjen e partive që kishin rritje të votave në zgjedhjet e 21 qershorit.
Kjo bëhet e besueshme, ndërsa mësohet se në Vlorë është vakant edhe vendi i Drejtorit te Autoritetit Ushqimor, pasi Renato Banushi është shkarkuar mëngjesin e sotëm. Sakaq, një ditë më parë u shkarkua nga detyre drejtori i portit të Vlorës Xhevahir Çeloaliaj.
Ndërkohë, pas rezultatit zhgënjyes në bashkinë e Lezhës kanë nisur dorëheqjet e detyruara të funksionarëve të LSI-së.
Mesjavën e kaluar atyre u është kërkuar të japin dorëheqjen dhe të largohen si drejtues pas performancës zhgënjyese që mori kandidati i majtë në bashkinë e Lezhës, Viktor Tushaj.
Ndërsa kërkesa u është drejtuar të enjten dhe të premten ka ardhur reagimi i parë nga drejtori i Bordit të Kullimit. Edhe fillim java nuk ka qenë e qetë për drejtorët e LSI-së. Drejtori i Portit, Postës, Sigurimeve dhe Bujqësisë nuk kanë vonuar të dorëhiqen nga postet, ndërsa pritet që brenda javës të gjitha drejtoritë e Lezhës të kenë drejtues të rinj.
Dorëheqje pritet të bëjnë edhe përfaqësuesit e Partisë Socialiste.
