I ftuar në Tonight Ilva Tare ambasadori i Federatës Ruse në Tiranë, Alexander Karpushin, ka shprehur interesin e Rusisë për bashkëpunim ekonomik dhe tregtar me Shqipërinë dhe se investitorët rusë janë të interesuar të investojnë në Shqipëri. Mes të tjerash ai ka folur edhe për konceptin e Shqipërisë së Madhe, e cila shihet si rrezik për Ballkanin dhe se do të jetë mirë që të mos realizohet. Lidhur me njohjen e shtetit të Kosovës, ambasadori nuk e ka shmangur dot cinizmin kur ka thënë se kjo çështje është e lidhur me shtetin serb; nëse Serbia do ta njohë, atëherë për Rusinë nuk do të jetë problem.
Karpushin tha se investimet ruse në Shqipëri janë private. Ca investitorë rus kanë blerë disa apartamente në Sarandë dhe më vonë patën probleme me legalizimin e pronës së tyre. Sa i përket biznesit të madh, mund të them se biznesmenë rus janë shumë të interesuar për të marrë pjesë në të gjitha tenderat që do të shpallë qeveria shqiptare. Ata janë të gatshëm të marrin pjesë në projekte të mëdha në Shqipëri.
Ambasadori rus tha në vijim se rusët po janë përqëndruar tek projekti i gazit “Turkish stream” dhe në qoftë se Shqipëria do të shprehet e interesuar për këtë projekt ajo ka të gjitha mundësitë që të marrë pjesë dhe të përfitojë nga ky projekt . Dhe në qoftë se Shqipëria do të tregohet e interesuar, Gazprom-i do e shqyrtojë këtë me shumë vëmendje.
Ambasadori rus tha se është një fakt i njohur se koncepti i Shqipërisë së Madhe ekziston. Detyra jonë e përbashkët është që ky koncept të mos realizohet. “ Kur udhëtoj në Maqedoni dhe shoh banesat e shqiptarëve mund të konstatoj se ato duken më të bukura dhe më të rehatshme se sa pallatet e maqedonasve, të sllavëve. Kjo do të thotë se shqiptarët janë shumë punëtorë, kanë ambicie shumë të mëdha, e jetojnë në kushte shumë të mira”, tha ai. Në vjim ai tha se po ecën para dialogu Beograd –Prishtinë dhe jam i bindur se kjo është rruga e drejtë. “Kur Serbia do të njohë Kosovën jam i bindur se edhe Rusia do ta ndryshojë qëndrimin e saj. Sa i përket Serbisë, patjetër që kemi angazhime të përcaktuara . Me Serbinë gëzojmë lidhje shumë të vjetra historike por qëllimi ynë i vetëm është t’i zhvillojmë lidhjet miqësore ndërmjet popujve tanë”, përfundoi ambasadori rus Alexander Karpushin.
