Arrestohet një i dyshuar se qëlloi me armë ndaj policisë. Personi i arrestuar ka inicialet Xh. M.
Në kuadër të aksionit policor pas ngjarjeve në Lazarat, policia e Gjirokastrës bënë me dije se gjatë kontrollit të ushtruar në Lazarat është bërë i mundur dhe sekuestrimi i një automjeti tip “Benz” i bardhë. Në të janë gjetur dhe sekuestruar 2 pushkë, 1 automatik tip “Kallashnikov”, 1 granatë, 1 kasetë me fishekë, një këmbëz mitralozi si dhe tre aparate celulare dhe tre qese farmaceutike të dyshuara me lëndë narkotike të llojit kokaine.
“U bë shoqërimi i drejtuesit të mjetit Xh. M.”, njofton policia.
Ndërkohë, burime të policisë bëjnë të ditur se ka identifikuar katër persona në Lazarat, të cilët lëvizin të armatosur dhe me maska. Të njëjta burime saktësojnë se polica i ka nën survejim këta persona.
Ndërkohë, dëshmitë nga Lazarati bëjnë të ditur se ka ende të shtëna sporadike armësh.
Nga ana e saj, polica ka rrethuar fshatin, ndërsa efektivë të tjerë gjenden edhe në brendësi të Lazaratit.
Dy policët e plagosur, Jetmir Isaj 33 vjeç, dhe Perlat Hamitaj 27 vjeç, kanë mbërritur në Spitalin Qendror Universitar të Traumave në Tiranë.
VRASJA E POLICIT NË LAZARAT/ Policia arreston një të dyshuar, identifikon të tjerët
