Policia e Vlorës arreston një punonjëse të Postës Shqiptare në Novoselë.
Nga të dhënat paraprake nga policia mësohet se punonjësja e postës, Luiza Mbyeti, 50 vjeç, banuese në fshatin Zhukë-Novoselë, dyshohet se ka vjedhur 6.200.000 lekë nga 210 abonentë të OSHEE, banorë të Novoselës.
Sipas policisë, gjatë hetimeve të kryera që prej janarit të këtij viti, mësohet se 50 vjeçarja ka ushtruar detyrën e arkëtares pranë Postës Shqiptare Vlorë, Filiali Novoselë për periudhën 12. 12. 2002 deri më 30. 09. 2009. Gjatë ushtrimit të kësaj detyre, ajo ka përvetësuar një shumë prej 6.200.000 lekë (të reja), pagesa të energjisë elektrike që abonentët e OSHEE-së, banorë të Komunës Novoselë, paguanin pranë Zyrës Postare Novoselë. Ajo vuloste dhe nënshkruante në librezat e energjisë elektrike të abonentëve të OSHEE, nga ana tjetër, nuk e pasqyronte këtë fakt në listat e arkëtimeve të pagesave të energjisë elektrike duke mos i derdhur në arkë shumat e paguara, e për rrjedhojë duke i përvetësuar këto shuma për vete.
Në kuadër të hetimeve të Krimit Ekonomik e Financiar, mësohet se ky veprim i paligjshëm ka dëmtuar 210 abonentë të OSHEE-së Komuna Novoselë, ku të gjithë vërtetohen me librezat e energjisë elektrike dhe vërtetimet e debisë të lëshuara nga OSHEE.
Luiza Mbyeti, 50 vjeç, ishte shpallur në kërkim që prej datës 10 qershor 2015 dhe menjëherë i është vendosur masa e sigurisë “arrest në burg” për veprën penale “vjedhja e kryer për shkak të detyrës”.
Arrestimi i saj u krye nga Specialistët e Krimit Ekonomik e Financiar,në hyrje të qytetit të Vlorës, ku po lëvizte me bashkëjetuesin e saj me automjetin e tyre.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
