Vladimir Gjuta u kap në tunel, pasi më parë u fikën dritat

Nën masa të rrepta sigurie ka mbërritur në Gjykatën e Krimeve të Rënda, Vladimir Gjuta. Kjo gjykatë rivlerësoi masën e sigurisë për 35-vjeçarin duke e lënë në burg.
Ai është njohur me akuzat e akteve terroriste ndaj familjes dhe biznesit të Ministrit të Brendshëm, Saimir Tahiri. Prokuroria thotë se Gjuta është ideator dhe organizatori i shpërthimit në farmacinë e babait të Ministrit të Brendshëm, pranë Qendrës Spitalore Universitare Nënë Tereza.
Gjithashtu ai dyshohet se ka urdhëruar vendosjen e tritolit të gjetur në Rrugën “Muhamet Gjollesha”, afër vendit ku parkonte makinën babai i Ministrit Tahiri. Për fat të mirë, kjo sasi eksplozivi nuk u aktivizua.
Në sallën e gjyqit Gjuta i ka mohuar akuzat duke këmbëngulur se nuk ka lidhje me ngjarjet e muajit Shkurt. Në burg është lënë dhe Indrit Ademi, i cili shoqëronte me një makinë Vladimir Gjutën.
Mbi Ademin është ngritur akuza e përkrahej se autorit të krimit. Ai nuk ka mohuar njohjen dhe ndihmën që po i jepte Gjutës. Gjuta dhe Ademi u arrestuan nga RENEA në “Rrugën e Kombit”, në hyrje të tunelit të Kalimashit.
Sipas policisë, 26-vjeçari Ademi ka qenë i pari që ka hyrë në tunel dhe është ndaluar në dalje të tij. Më ai i ka dërguar një mesazh Gjutës, me të cilin e njoftonte se rruga ishte e lirë.
Sapo Vladimir Gjuta ka hyrë në tunel janë fikur dritat dhe është njoftuar për një defekt në tunel. Ky ka qenë momenti kur kanë ndërhyrë forcat RENEA, duke arrestuar Gjutën dhe shoferin e tij, Blerim Thaçi, me origjinë nga Kosova. Edhe për këtë të fundit, gjykata vendosi masën e sigurisë “arrest me burg”.
Në dëshminë në polici, Gjuta ka thënë se Thaçin e ka marrë në makinë pasi i ka bërë shenjë për auto – stop. Blerim Thaçi mësohet të mos këtë folur deri në këto momente.
Pritet që Prokuroria për Krimet e Rënda të verifikojë komunikimet telefonike të Gjutës e Thaçit, për të vërtetuar pretendimet e ngritura. Vladimir Gjuta u arrestua të enjten, pasi ishte mbajtur nën vëzhgim për disa orë me radhë.

/DRONI.al/