Disa mijëra qytetarë të Fierit dhe zonave përreth mbushën sot sheshin kryesor në Fier në mbështetje të kandidatit të opozitës, Enkelejd Alibeaj, duke shënuar mitingun më të madh të PD-së në këtë qytet. Alibeaj duke iu drejtuar pjesëmarrësve tha se sot të gjithë fierakët ndjejnë mision historik për të ngritur bashkinë e Fierit. Jam i nderuar dhe i privilegjuar, ju shtrij dorën të gjithëve, të bashkuar të majtë dhe të djathtë, të hapim një faqe të re ku qeverisja të jetë e Fierit dhe e fierakëve. Asnjë frikë, asnjë blerje votash dhe dhunë nuk mund të ndalojë fitoren tonë, tha Alibeaj.
Në vijim të fjalës së tij ai theksoi se biznesi do të jeta aleati më i madh i punësimit. Ajo që i ka munguar këtij qyteti është që qeverisja e qytetit nuk shët ndarë me ju, por që sot e tutje ajo do të ndahet me ju dhe do të jetë në shërbimin tuaj. Do të jetë një bashki në shërbim të njerëzve, do i presë dhe do u ndodhet pranë, një bashki që do të jetë shtëpia e madhe e gjithë fierakëve.
Kryetari i PD-së, Basha tha se kandidati socialist Subashi votoi kundër amandementeve të opozitës në Parlament ku kërkohej ulja e taksave dhe cmimeve . Ai nuk është këtu për fierakët. Por po vjen të marrë atë që ka mbetur që ta ndajë me padronët në Tiranë. Imagjinoni si do të ishte Fieri këto dy vite në vend që të sulmonin opozitën të punonin për hallet e tuaja.
Mitingjet mbarojnë dhe politikanët shkojnë në shtëpi e shohin veten në tv. Flenë në dyshekë plot me lek. Shikoni njeriun që ju respekton më shumë, Enkelejd Alibeajn që i vuri pushkën korrupsionit, njeriun e ndershëm dhe më integritet, përfundoi Basha.
