Një 49 vjeçar shqiptar, kryetar i një bande mafioze që jepte fajde në mënyrë të paligjshme, është dënuar me 14 vjet burg në Nju Jork të SHBA-ve. Ndaj Ylli Gjelit pronar i një lokali në Nju Jork dhe i njohur si kryetar i kësaj bande, të përbërë nga shqiptarë, akuzohet për zhvatje të parave përmes dhunës.
Ylli Gjeli, së bashku me pjesëtarët e tjerë të grupit të tij, jepnin para borxh me interesa të larta, kryesisht për kumarxhinjtë. Interesat silleshin nga 2-3 për qind për çdo javë.
Në rast të moskthimit të borxhit, shkulje thonjsh, shtypje gishtash me çekish dhe shkulje flokësh ishin metodat e dhunshme që përdorte Ylli Gjeli për të kthyer mbrapsht nga klientët paratë që ua jepte borxh.
Hetimet tregojnë se banda e Gjelit ka mundur të përfitojë rreth 1.18 milionë dollarë vetëm nga interesat e fajdeve që jepte. Gjithashtu, ky grup ishte i lidhur edhe me bastet dhe trukime në sporte të ndryshme. Vetëm me bastet ata kanë mundur të përfitojnë në mënyrë të paligjshme 2.9 milionë dollarë në gjashtë vjet.
Gjatë gjykimit, Ylli Gjeli, 49-vjeçari ka mohuar akuzat, duke pretenduar se ishte viktimë e një konspiracioni ndaj tij.
“Nuk kam bërë asgjë të gabuar. Unë jam viktima. Por ju mund të bëni ç’të doni me mua”, deklaroi Ylli Gjeli.
Pavarësisht pretendimeve, gjykata e shpalli fajtor Ylli Gjelin dhe e dënoi me 14 vjet burg.
Sipas medieve amerikane, bashkëpunëtori më i ngushtë i Ylli Gjelit ishte Fatmir Mustafaraj, një ish-oficer i policisë ushtarake shqiptare, i cili është dënuar me 12 vjet burg. Bashkëpunëtorë të tij janë edhe 7 persona të tjerë që pritet të gjykohen dhe të marrin dënimin e mundshëm.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
