Kandidati i pavarur Gjergj Bojaxhi deklaroi sot në një takim me studentë se ai ka ndërmend të vazhdojë garën ën politikë edhe pas zgjedhjeve lokale. Ai nuk deklaroi emrin e partisë që ai pritet të krijojë por la të kuptohet se mund të mbajë në mos emrin, filozofinë e grupit “Ne Tirana”.
“Jam i bindur se grupimi “Ne Tirana” do ta ndryshojë politikën jo vetëm deri në 21 Qershor por edhe më pas”, tha ai. “Ndryshimi fillon gjithmonë nga grupe të vogla që sfidojnë status quo-në dhe marrin kurajon për të ndryshuar pjesën e tyre të botës”, deklaroi në vijim Bojaxhi.
Sipas tij shkaku i keqqeverisjes dhe problemeve të tjera që kalon Tirana dhe e gjithë Shqipëria është politik: sistemi i korruptuar dhe klientelist partiak që kushtëzon qeverisjen në favor të interesave private dhe në dëm të interesit publik. I njëjti shkak dhe e njëjta situatë është edhe në qytetin e Tiranës. Për këtë arsye, u shpreh ai, theksi kryesor i fushatës dhe premtimeve tona ka qënë crrënjosja e klientelizmit dhe depolitizimi i plotë i Bashkisë së Tiranës. Nëse anshkalojmë këto probleme me natyrë politike dhe e kthejmë debatin në çështje teknike do jemi duke luajtur teatër, skenari i të cilit do të jetë njëri premton 5 fusha sportive, tjetri 7 e një tjetër 17.
Deklaratën për vijimin e tij në politikë Bojaxhi e bëri në Universitetin Europian të Tiranës. Tek ky universitet që ka për slogan “Jemi në të gjitha” janë promovuar edhe kandidatë të tjerë të majtë e të djathtë që kandidojnë për zgjedhjet lokale.
