Në një kohë që një Kolegj Penal i Gjykatës së Lartë vendosi dje pushim të çështjes penale ndaj dy deputetëve të akuzuar për “goditje për shkak të detyrës”, të njëjtin fat nuk e kanë pasur disa shtetas të tjerë në Gjykatën e Tiranës, që kanë qenë “qytetarë të thjeshtë”. Sipas gazetës “Panorama”, që nga fillimi i vitit 2015, Gjykata e kryeqytetit ka përfunduar shqyrtimin e 19 dosjeve penale, ku të pandehurit kanë qenë akuzuar për veprën penale të “goditjes për shkak të detyrës
Përveç dy rasteve, që çështjet janë pushuar për shkak të papërgjegjshmërisë mendore të të pandehurve, në 17 rastet e tjera të akuzuarit kanë marrë vendime fajësie. Masa e dënimit të tyre varion me gjobë deri në 200 mijë lekë, ose dënime më burg nga 2 muaj deri në 1 vit.
Në këto vendime gjyqësore rezulton se pjesa më e madhe janë qytetarë që kanë ushtruar veprime të dhunshme fizike ndaj funksionarëve të policisë rrugore, apo të rendit, punonjës të policive private, por nuk mungojnë edhe rastet kur të pandehurit akuzohen për goditje të punonjësve të CEZ-it, apo të INUK-ut.
Thuajse në të gjitha rastet, të pandehurit kanë pranuar fajësinë e tyre dhe çështjet janë zhvilluar me procedurën e gjykimit të shkurtuar, fakt që është reflektuar edhe në uljen e një të tretës së masës së tyre të gjobës, apo të dënimit me burg.
Në disa raste të tjera, Gjykata ka vendosur pezullimin e ekzekutimit të dënimit me burg dhe caktimin e periudhave 18- mujore, gjatë së cilës të dënuarit duhet të mbajnë kontakte më shërbimin e provës dhe të mos kryejnë asnjë vepër tjetër penale.
VITI 2015/ Dy standarde, gjykata e Tiranës 17 dënime qytetarësh për dhunë, Gjykata e Lartë një pafajësi për deputetët dhunues
