Kandidatja për bashkinë e Durrësit, Grida Duma tha se bashkia do të ndërtojë 500 banesa sociale ç’ka do të jetë një zgjidhje e shpejtë për qindra familje që presin ndihmën e bashkisë.
“15 mijë vende pune në fund të katër viteve që do të thotë luftë frontale ndaj papunësisë dhe varfërisë. Janë 5 mijë aplikime për strehim dhe në 8 vite u propozuan 340 banesa. në 8 vite u realizuan 120 dhe me këtë ritëm duhen nja 50 mandate për të kaluar kërkesat aktuale. Banesat sociale do zgjidhen duke përdorur një pjesë të madhe të pronave të bashkisë për zgjidhjen e problemit të strehimit, ç’ka do të thotë që në fund të mandatit ne do të kemi 500 banesa sociale”, tha Duma.
Me banorët e kësaj lagje, Duma foli edhe për rivitalizimin urban të lagjeve. “Rikostruksioni duhet të jetë në këtë standard: me ndriçim, me stol, me gjelbërim. Po nuk qe kështu, kjo nuk është investim, kjo nuk është rrugë. Dhe po nuk qe kështu, atëhere nuk kemi bërë asgjë përveçse dëm edhe këtë investimin e parë. Do kemi 3 pika parkimi vertikal në zonën e plazhit, në zonën e Currilave dhe në zonën e stacionit e autobuzave do të jetë një lehtësim i parkimit”, u shpreh Duma.
