Mbyllen hetimet për Tom Doshin, Mark Frrokun dhe Durim Bamin, dhe dosja e tyre me akuzën për “kallëzim të rremë”, është dërguar për gjykim në Gjykatën e Lartë.
Dosja është mbyllur dje, ndërsa mësohet se menjëherë është dërguar edhe në gjykatë.
Doshi, Frroku dhe Bami, akuzohen për sajesë të atentatit të mundshëm, ndaj deputetëve Tom Doshi dhe Mhill Fufi, nga Ilir Meta.
Sipas prokurorisë, për tre të akuzuarit ka prova për dëshmi të rremë për të ashtuquajturin komplot të vrasjes së dy deputetëve.
Sipas Prokurorisë, pretendimet e deputetit Tom Doshi se kanë dashur ta ekzekutojnë nuk qëndrojnë, prandaj ai do të gjykohet tashmë nga Gjykata e Lartë. Po ashtu edhe deputeti tjetër Mark Frroku. Mbi ta rëndonin tre akuza, dy prej të cilave kanë rënë.
Bashkë me dosjet e tyre, organi i akuzës ka dërguar për gjykim edhe dosjen e Durim Bamit, i njohur si atentatori i Doshit, edhe ai me akuzën “kallëzim i rremë”.
Pritet që brenda 10 ditësh të hidhet shorti për gjyqtarët e çështjes.
Dosja e Doshit, Frrokut e Bamit dërgohet në gjykatë për “dëshmi të rremë”
