Ambasadori amerikan Donald Lu, apelon se është me shumë rëndësi që të kontrollohen mirë listat dhe e shkuara e kandidatëve, duke bërë edhe një herë thirrje për dekriminalizim të politikës. Lu bëri thirrje që kandidatët me të shkuar kriminale të mos votohen, duke lënë të kuptohet në këtë mënyrë se ambasada dyshon se në lista ka persona me rekorde kriminale.
Këtë apel, Ambasadori amerikan e bëri gjatë një takimi të zhvilluar nën kujdesin e Ambasadës së Shteteve të Bashkuara të Amerikës, në Shkodër ku u ballafaquan dy kandidatet për bashkinë e këtij qyteti Keti Bazhdari e PS dhe Voltana Ademi e PD.
“Duhet parë mirë e kaluara e kandidatëve. Kandidatët me të shkuar kriminale mos t’i votojmë”, theksoi Lu
Duke u rikthyer te bashkia e Shkodrës, kryediplomati amerikan e cilësoi si një moment historik kandidimin e dy grave për këtë bashki. Sipas Lu Shqipëria do të përfitojë edhe më shumë nga pjesëmarrja e grave në politikë. Ndërkohë shtoi se në këto zgjedhje do të ketë një peshë të konsiderueshme edhe pjesëmarrja e votuesve të rinj, duke theksuar se vota “nuk duhet të shitet”.
“Moment historik përballja e dy grave Shkodër. Shqipëria do të përfitojë nëse ka shumë gra. Vendimtare do të jetë pjesëmarrja e votuesve të rinj, por bëj thirrje, mos shisni votën!”, u shpreh Lu.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
