Përshtypjet e turistëve në shekullit e 19-të dhe në fillim të shekullit 20-të pasi vizitonin këtë pjesë të botës
Historia, feja, zakonet dhe tradita e 69 fiseve dhe bajraqeve të Veriut të Shqipërisë vijnë në një përmbledhje nga albanologu, shkrimtari dhe përkthyesi Robert Elsie.
I njohur për eksplorimin e tij të gjuhës dhe letërsisë shqipe duke mos lënë anash as kultivimin e fotografisë, Elsie paralajmëron librin e tij më të ri mbi fiset shqiptare dhe kulturën e tyre.
Që prej vitit 1978 ai pati mundësinë të vizitojë Shqipërinë disa herë në kuadrin e takimeve shkencore mes Institutit të Gjuhësisë së Universitetit të Bonit dhe Akademisë së Shkencave të Shqipërisë.
“Sapo doli edhe një libër nga unë, këtë herë për fiset dhe bajraqet e Veriut të Shqipërisë, ku përmenden gjithsej 69 fise dhe bajraqe, me informacion për historinë, fenë, zakonet dhe traditat të tyre, si dhe me vëzhgime të udhëtarëve të huaj të hershëm për ata”, kështu e ka nisur librin e tij të ri Robert Elsie, shkrimtari e specialisti i studimeve shqipe.
Janë gjithsej 69 fise të përfshira në këtë libër, ndërsa në pjesën e dytë të librit përfshihen edhe përshtypjet që turistët kishin në shekullin e 19-të dhe në fillim të shekullit 20-të pasi vizitonin këtë pjesë të botës.
Fisi i Kastratëve, Bogëve, Shkrelëve, Fisi Lohja, Fisi Kiri e Suma, Fisi Drishti, dhe të tjera fise bëjnë pjesë në librin e shkrimtarit të njohur Robert Elsie.
Duke i cilësuar këto shoqëri fisnore, unike dhe sipas tij një “relik” e veçantë, të cilat kanë ende gjurmë të dukshme në malet e Shqipërisë Veriore, Elsie shprehet se “ajo është konsideruar si i vetmi shembull i vërtetë i një shoqërie fisnore e mbijetuar në Evropë deri në mesit shekullit të njëzetë”.
Sipas tij, veriu i vendit ende mbetet një vend shumë i ndryshëm nga jugu më i avancuar i Shqipërisë, dhe nga pjesa tjetër e botës.
