Meta aludon: SHISH zbuloi aflatoksinën në miell. Akuzohen disa kompani, kontrollohet vetëm kandidati

Ja shpjegimi i Ilir Metës lidhur me kontrollin në fabrikën e miellit të kandidatit demokrat në Vorë, Fiqiri Ismaili, dhe më pas bllokimin e saj nga ministria e Bujqësisë.
“ E vërteta është se Ministri i Bujqësisë ka marrë një shkresë, të cilën ju mund të shkoni ta verifikoni, sepse jeni deputet serioz, edhe Ministri mund t’ua japë shkresën që ka marrë para 2-3 javësh, ku informohet nga një shërbim i pavarur që merret edhe me sigurinë ushqimore, por merret edhe me sigurinë kombëtare, që ka probleme me miellin që është me substanca kancerogjene, aflatoksinë e kështu me radhë. Dhe i kanë thënë edhe emrat e disa kompanive që dyshohen dhe kanë rekomanduar që të bëhen kontrolle për këtë çështje. Dhe janë bërë disa kontrolle bazuar në këtë dokument zyrtar, që Ministri e ka të arkivuar dhe që mund ta verifikoni në çdo kohë dhe kanë dalë disa raste, ku një prej tyre është edhe i kompanisë në fjalë. Tani unë do t’jua jap t’i shikoni për kuriozitet, do t’ia rekomandoj Ministrit të Bujqësisë t’ia çojë të gjithë institucioneve, të gjithë ndërkombëtareve. Mielli që është bllokuar është jashtë çdo standardi më të papranueshëm që mund të mbahet një mall, jo më mielli që shkon për njerëzit, për qytetarët. Që duhet të ketë ventilim dhe këtu në magazinë siç shihet në foto nuk ka as dritare e jo më të ketë ventilim. Që duhet të jetë i mbrojtur nga lagështirë, ndërkohë që aty hyjnë edhe qentë e edhe macet, sepse ka vetëm ca teneqe për ta mbuluar dhe lagështira është katastrofike, etj.”