FOTO/ Avioni amerikan fluturon mbi Kinën e Jugut, Pekini lëshon paralajmërime

Marina kineze lëshoi 8 paralajmërime për një avion survejimi amerikan, i cili fluturoi të mërkurën mbi zonat e kontestuara në detin e Kinës së Jugut.
Avioni kreu një mision zbulimi në një zonë ku Kina është duke ndërtuar një seri ishujsh artificial, të cilët, sipas SHBA-ve, po ndërtohen në ujërat ndërkombëtarë dhe janë shqetësues. Një ekip i CNN u lejua në bordin a avionit “P8-A Poseidon”, teksa ai fluturoi mbi ishuj.
SHBA-të po shqyrtojnë mundësinë për të zhvilluar misione të tilla vëzhgimi edhe më afër mbi ishuj, si dhe të afrojnë luftanijet në këto zona. Kjo përpjekje shihet si një kundërpërgjigje e fuqishme ushtarake e Shteteve të Bashkuara, të cilat kërkojnë ta bëjnë të qartë se nuk i njohin pretendimet territoriale të Kinës.
Në videon e xhiruar nga CNN në bordin e avionit dëgjohet një zë në gjuhën angleze: Kjo është marina kineze… kjo është marina kineze … ju lutem largohuni… për të shmangur keqkuptimet.
Gjatë javës së kaluar, Sekretari amerikan i Shtetit, John Kerry ka shprehur shqetësimin e tij për synimet e shprehura qartë nga Kina, e cila pretendon thuajse të gjithë detin e Kinës së Jugut, duke u përplasur kështu me Brunein, Taivanin, Filipinet, Vietnamin dhe Malajzinë. Kerry apeloi për veprime që do të ndikonin në uljen e tensioneve dhe rritjen e perspektivës së një zgjidhjeje diplomatike.
Më herët, Presidenti amerikan kanë thënë se Kina është duke ushtruar presion edhe të fqinjët, duke ndërtuar ishuj brenda kufijve detarë të Filipineve. Nga ana tjetër, Kina mbrohet duke deklaruar se ndërtimi i ishujve është i nevojshëm për të ruajtur sovranitetin e vendit.