Kathimerini: Turqia po përdor Shqipërinë kundër interesave greke

Shtypi grek vijon të shohë me shumë shqetësim lëvizjet e Tiranës zyrtare, pas notë kërkesës nga Ministria e Jashtme Shqiptare, për vënien në dispozicion të hartave detare e tokësore ku do të kryhen shpime për naftë.
Athina dyshon se pas kërkesës së qeverisë shqiptare, për rishikimin e planit grek për kërkimin e hidrokarbureve në ujërat e detit Jon, fshihen pretendimet territoriale të Shqipërisë në veri të Greqisë. Dyshimet janë ngritur nga e përditshmja greke “Kathimerini”, e cila u referohet burimeve diplomatike.
Krahas rishikimit të planit për kërkime në detin Jon, Tirana zyrtare kërkon që autoritetet greke t’i vënë në dispozicion të dhëna nga një studim gjeologjik i kryer në rajonin e Epirit, në veriperëndim të Greqisë. Ky fakt interpretohet nga Athina si një përpjekje e Shqipërisë për të vënë në diskutim kufirin tokësor mes dy vendeve.
Në vitin 2011 është bërë një studim gjeologjik në një hapësirë të gjerë në zonat në veri të Janinës, siç thotë ish – Ministri grek i Energjisë Janis Maniatis. Por nga Tirana zyrtare, në atë kohë nuk pati asnjë kërkesë.
Nota e qeverisë shqiptare, sipas “Kathimerinit” është e nxitur nga Turqia. Burimet diplomatike greke thonë se Ankaraja po punon kundër interesave greke, duke përdorur për këto qëllime, Shqipërinë.
Si shembull për këtë gazeta sjell takimin e Presidentit Turk Rexhep Taip Erdoan me drejtues të Partisë për Drejtësi, Integrim dhe Unitet gjatë vizitës së javës së kaluar në Tiranë. Ky takim, sipas të përditshmes greke kishte për qëllim, rindezjen e debatit për dëmshpërbilimin e popullsisë çame të dëbuar nga veriu i Greqisë, pas Luftës së Dytë Botërore, me pretendimin se ishin bashkëpuntorë të nazistëve.
Këto lëvizje të Tiranës Zyrtare të bashkërenduara me Ankaranë shihen si një përpjekje për të promovuar vizionin e Shqipërisë së Madhe.
Ky është shkaku, pse Ministri i Jashtëm grek Nikos Koxias nuk e ka konfirmuar ende pjesëmarrjen në takimin e ministrave të Jashtëm, të Procesit të Bashkëpunimit të Europës Jug – Lindore (SEECP), që do të zhvillohet të premten në Tiranë.
Në një reagim për Televizionin Klan, Ministria e Jashtme shqiptare thotë se nuk pranon të komentojë një shkrim të pabazuar dhe që paraqet një të pavërtetë të madhe, pasi sipas saj, Shqipëria dhe Greqia kanë nënshkruar aktin e Helsinkit dhe nuk kanë pretendime territoriale ndaj njëra tjetrës(klan).

/DRONI.al/