“Durrësi është qytet i trashëgimisë arkeologjike por në fakt bust ka Tina Tërner”
Turizmi dhe kthimi i Durrësit në destinacionin e parë turistik ka qenë fokusi i bashkëbisedimit të kandidates së djathtë për bashkinë e Durrësit Grida Duma me operatorët dhe bizneset turistike.
“Këtu nuk ka turizëm e në fakt ka një kaotizëm ndaj turizmit, i cili do një rregullim imediat në bashkëpunim me agjentët e rëndësishëm që jeni ju. Infrastruktura, kanalizimet, uji i pijshëm janë sot elementë bazikë që në qoftë se mungojnë në një qytet, nënkupton që mungon jeta qytetare e imagjinoni nëse mungojnë në turizëm. Si mund të bësh turizëm kur nuk ke mundësi të vendosësh disa simbolika që qyteti i ka me bollëk. Është qytet i trashëgimisë arkeologjike por në fakt bust ka të Tina Tërnerit. Nëse do të vendosim një urë komunikimi konkrete dhe të vërtetë shumë gjëra do të mund ti riparojmë edhe në një kohë shumë më të shkurtër. Do të realizojmë një program real e konkret për një qytet që meriton të paktën të quhet i pari në turizëm dhe i dyti në metropol të hapësirës shqiptare”, u shpreh kandidatja e djathtë.
Duma ndau nevojën për një plan ndryshe për zhvillimin e turizmit ku dhe të pranishmit theksuan idenë e kthimit të Durrësit në bashkinë me 12 muaj turizëm dhe jo vetëm verorë.
“Ne e dimë që Durrësi mbahet për turizëm 3 muaj ndërsa qendra të tjera turistike frekuentohen 12 muaj të vitit duke shfrytëzuar të gjithë potencialin historik dhe kulturor”, tha një prej operatorëve durrsakë së cilit kandidatja e djathtë ju përgjigj me planin për Hartimin e një guide profesionale turistike falas nga bashkia, e aksesueshme në internet ku të jenë pjesë të gjithë bizneset e qytetit.
Duma u shpreh se puna e parë do të jetë hartimi i një guide profesionale turistike falas nga bashkia, e aksesueshme në internet ku të jenë pjesë të gjithë bizneset e qytetit.
“Po të jesh në botë dhe të kesh këtë vijë bregdetare, edhe gjatë dimrit ka me dhjetëra mënyra për të bërë turizëm pa shumë kosto. Të flasim njëherë për një guide profesionale turistike që mungon plotësisht në qytet, për këto gjëra që janë dhe për to që ju me shumë mund arriti ti përkëtheni në turizëm”, -u shpreh kandidatja e djathtë.
Kandidatja Duma u mbështet edhe në projektin e saj për të rehabilituar zonën e plazhit si dhe për të hartuar një plan konkret që të kategorizohet e të përshtatet për të gjitha kërkesat e turistëve.
“Zona e plazhit kërkon një rehabilitim tjetër dhe për ta ka kategorizuar atë në një zonë të rehabilituar dhe së cilës kategori, gjë që ne duhet të ulemi sërish. Sepse ju duhet ta shikoni në plan konkret. Duhet të ulemi dhe të themi; rehabilitimi i zonës së plazhit; a do konceptohet ai si një turizëm rajonal, a do të konceptohet si turizëm i shtresës së mesme dhe me cilat standarde dhe më pas të shkuarit drejt një programi tjetër turistik më shumë elitar se kjo dhe për cilën zonë. Pjesa veriore e bashkisë duhet të ketë një rrjet infrastrukturor që të nxjerr deri në det”, tha Duma.
Duma tha se plani i saj do të ulë taksat dhe do të ndihmojë bizneset që punësojnë shumë qytetar.
