Disa ndryshime në kupolën drejtuese të Policisë së Shtetit, si dhe në disa qarqe, kanë ndodhur sot.
Ardian Çipa, i cili deri sot mbante postin e drejtorit të Policisë së Qarkut të Tiranës, emërohet Zëvendësdrejtor i Përgjithshëm i Policisë së Shtetit, për Krimet e Rënda, në vend të Haki Çakos, i cili u emërua Drejtor i Përgjithshëm i Policisë së Shtetit. Ndërkohë, në vend të Ardian Çipës, në krye të policisë së Tiranës do të ulet Ervin Hodo, si drejtor i Policisë së këtij Qarku.
Ndërkohë, kupola e Policisë së Shtetit, ka pësuar të tjera ndryshime sot, pasi Rebani Jaupaj është emëruar Drejtor i Krimit Ekonomik në Policinë e Shtetit. Rebani Jaupaj ka mbajtur postin e zëvendësdrejtorit të Policisë së Qarkut të Tiranës.
Ndryshime kanë pësuar edhe strukturat më të larta drejtuese të policisë së qarqeve, Fier dhe Elbasan.
Neritan Nallbati nga drejtori i Policisë së Qarkut të Elbasanit transferohet në të njëjtin pozicion në Policinë e Fierit, ndërsa Alfred Çepe emërohet Drejtor i Policisë së Qarkut të Elbasanit.
Ndërkohë, Behar Caka është emëruar shef komisariatit të Policisë së Vlorës.
Emërimet e reja në Polici
Ardian Çipa, Zëvendësdrejtor i Përgjithshëm i Policisë së Shtetit, për Krimet e Rënda
Rebani Jaupaj, Drejtor i Krimit Ekonomik në Policinë e Shtetit
Ervin Hodo, Drejtor i Policisë së Qarkut, Tiranë
Neritan Nallbati, Drejtori i Policisë së Qarkut, Fier
Alfred Çepe, Drejtor i Policisë së Qarkut, Elbasan
Behar Caka, Shef i Komisariatit të Policisë, Vlorë
