Artur dhe Oltjana Merko, një çift tregtarësh në lagjen “Mbrostar Ferko” në Fier më 28 mars të këtij viti mbyllën aktivitetin e tyre dhe së bashku me dy fëmijët emigruan në Gjermani për një jetë më të mirë. Arturi kishte një dyqan ku shiste veshje sportive, ndërkohë që bashkëshortja e tij kishte dyqan kozmetike.
Rreth tri javë pas largimit në Gjermani, persona ende të paidentifikuar bastisën banesën e tyre në qytetin e Fierit, duke marrë mallin e dy dyqaneve si dhe orendi e sende shtëpiake. Kanë qenë prindërit e Oltjanës, ata që kanë konstatuar vjedhjen e shtëpisë së vajzës së tyre dhe menjëherë kanë bërë denoncim në polici dhe më pas dhe në prokurori.
Babai i tregtares, Ramazan Hodaj, tregon se “vajza ime me bashkëshortin e saj kanë jetuar 15 vjet në Greqi. Pasi u kthyen, ata morën dy dyqane me qira në Fier. Vajza shiste produkte kozmetike, ndërsa dhëndri, veshje sportive për fëmijë. Por, këto dy vitet ata s’kishin punë fare, ndaj u detyruan që të mbyllnin dy dyqanet. Ata morën mallin dhe e futën në shtëpi. Para se të niseshin në Gjermani, na dhanë çelësat e banesës së tyre që ta kontrollonim dhe ta ajrosnim. Më 28 mars, ata ikën bashkë me dy fëmijët e tyre”.
E ndërsa kanë mësuar lajmin për vjedhjen e banesës, Artur dhe Oltjana Merko u kanë bërë apel organeve të drejtësisë që të zbardhin ngjarjen, ndërsa kanë deklaruar se nuk do të kthehen më në Shqipëri ku ka vetëm fukarallëk.
Ramazan Hodaj akuzoi policinë, duke u shprehur se nuk ka bërë asgjë për identifikimin dhe vënien në pranga të autorëve të krimit.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
