Kronikë e një ngjarjeje të paralajmëruar nga krerët e maxhorancës e ka cilësuar ish-Kryeministri Sali Berisha për TV Klan, kërkesën e bërë nga Prokuroria për arrestimin e dy deputetëve, Tom Doshi e Mark Frroku.
Sipas Berishës gjithçka bëhet për të shpëtuar kreun e parlamentit nga akuzat e ngritura se, Ilir Meta ka porositur vrasjen e Doshit dhe të demokratit Mhill Fufi.
Skepticizmin për një hetim të plotë e të gjithanshëm pa dorëheqjen e Ilir Metës, ish-Kyeministri Berisha nuk e fsheh. Madje kërkon nga organi i akuzës të ndjekë të njëjtin standard edhe me Kryeparlamentarin Meta, lidhur me ato që ai i cilëson shpifje të Metës në adresë të opozitës dhe familjarëve të Deputetit demokrat Mhill Fufi.
Ndaj zbardhjen e plotë e të paanshme të akuzave të ngritura ndaj kreut të Kuvendit, Berisha thotë se e sheh vetëm te një ekspertizë ndërkombëtare, modelet për të cilën thotë se ekzistojnë.
Ish-Kryeministri Berisha shprehet se mos dorëheqja e Ilir Metës, edhe pas thirrjeve të ndërkombëtarëve, penalizon shqiptarët përpara partnerëve europianë dhe destabilizon situatën në vend.
Berisha: Arrestimi i Doshit dhe Frrokut për të shpëtuar Metën, zbardhja e akuzave vetëm nga një ekspertizë ndërkombëtare
