Ish kryetari i Partisë Demokratike, Sali Berisha, në dalje nga salla e Kuvendit, deklaroi se Mark Frroku është fytyra e qeverisë së sotme, e lidhjeve të saj me krimin, pengu i mbajtur nga Rama e Meta.
“Mark Frroku është fytyra më e shëmtuar e këtyre lidhjeve. Është fytyra e këtij parlamenti. Është fytyra e kësaj qeverisje. Bosi i tij është Ilir Meta dhe dua tu bëj apel edhe njëherë qytetarëve shqiptarë, kurajës së tyre, përgjegjësisë së tyre të vendosim ne për një revolucion demokrat dhe paqësor si rruga e vetme. Përveç revolucionit asgjë nuk do të shkulë dot krimin që ka pushtuar qeverinë dhe këtë administratë. Revolucioni demokratik dhe paqësor është përgjigja qytetare për sigurinë e çdo njeriu. Përndryshe ju garantoj se Mark Frrokrit do të shkojnë larg e më larg”, tha Berisha.
Për herë të pare Berisha foli dhe për një ministër të kabinetit qeveritar, që sipas tij ka të paktën 200 telefonata me kontingjent kriminal të regjistruara nga shërbimet ligjzbatuese të një vendi mik, ndërsa emrin tha se do ta bëjë publik në një moment tjetër.
“Sot në këtë kabinet më thotë një i huaj se ka ministër që ka 200 telefonata me kriminelë. Në momentin e duhur do ta them. Do ta themi pa diskutim nuk ngurrojmë. Sot për sot Ilir Meta ka pushtuar kreun e Parlamentit dhe nuk bën detyrën më minimale të paraqitet si deputet para prokurorisë. Meta ka frikë nga arrestimi, është i tmerruar nga krimi. Meta është i përfshirë në skenar sepse e fshehu skenarin 6 muaj. Do ju tregoj vetëm një ndodhi nga jeta ime politike. Më ka ardhur Tan Prifti në zyrë me një video. Cili ishte reagimi im, ishte vetëm një, çoje urgjent në Prokurori. S’mund të ketë kurrë përgjigje tjetër, s’mund të bllokoj hetimin. Edi Rama ka ngarkuar kryeprokuror Saimir Tahirin. Kurse këta e mbajtën 6 muaj. Përse e mbajti, sepse shpresoi se do mundte të fajësonte Sali Berishën, në mënyrën më monstruoze për skenarin e tij. Do mundte të manipulonte çdo provë dhe të eliminonte dy dëshmitarët kyç. Dështoi. Çfarë ndodhi më pas, ky njeri që skenari kriminel e ka pushtuar në çdo qelizë të tij, doli dhe u tha shqiptarëve se nuk e jap dorëheqjen e kam dhënë njëherë për Shkëlzenin, se ishte në video. Edi Rama dhe Tom Doshi kishte ruajtura Shkëlzenin e Tom Doshi? Pasi dështoi me këto variante, atëherë u tha tjetrën, unë nuk e kam mbajtur sekret për vete por për Sali Berishën. Pasi dështoi dhe më këtë turp të tij, atëherë kërkoi Baba Takun, torbën e zezë ku mban kokainën e Gëzim Çelës”, deklaroi ish-kryeministri.
I pyetur nëse do ta udhëhiqte këtë revolucion për të cilin bën thirrje, Berisha tha se do të marrë pjesë si qytetar pasi opozita ka udhëheqjen e vetë.
“Unë jam ish-kryeministri dhe ish-kryetari i PD-së, jam i gatshëm të jem një prej qytetarëve aty. Opozita ka udhëheqjen e vetë, unë flas atë që ndiej. Kemi kërkuar dhe do kërkojmë hetim ndërkombëtar”, tha Berisha.
Berisha: Frroku fytyra e qeverisë së lidhur me krimin, një ministër 20 telefonata me rkiminelë
