500 mjekë e infermierë peticion kundër testimit të tyre

Mjekët dhe infermierët e sistemit spitalor përmes një peticioni dërguar krerëve më të lartë të shtetit kërkojnë anulimin e testimit kombëtar të muajit shkurt. Peticioni është firmosur nga rreth 500 bluza të bardha, ndërkohë që i është drejtuar Presidentit të Republikës, Bujar Nishani, kreut të parlamentit, Ilir Meta dhe kryeministrit Edi Rama. Në dokumentin që është dërguar të premten e javës së kaluar, testimi cilësohet si antiligjor e për pasojë ai nuk duhet të kryhet. Kryesisht peticioni është firmosur nga mjekët dhe infermierët e Qendrës Spitalore Universitare “Nënë Tereza”.

Përplasja
Peticioni i mjekëve vjen rreth dy javë pasi, ministri i Shëndetësisë, Ilir Beqaj bëri me dije se mjekët dhe infermierët e sistemit parësor dhe atij spitalor do t’i nënshtroheshin një testimi kombëtar, ndërsa qëllimi i tij ishte ‘fotografimi’ i njohurive profesionale te bluzat e bardha. Por kjo nismë nuk u mirëprit nga këta të fundit, të cilët që në ditët e para të lançimit të saj e kundërshtuan. Po ashtu, disa profesorë ngritën pikëpyetje për faktin se kush do të mund t’i testonte ata specialistë që ushtrojnë këtë profesion prej vitesh. Ndërkohë që, edhe Urdhri i Mjekëve të Shqipërisë shprehu hapur qëndrimin ‘kundër’ zhvillimit të testit. Sipas presidentit të UMSH-së, Din Abazaj, “mjekët dhe infermierët nuk duhet t’i nënshtrohen testimit, pasi ata që janë aktualisht në sistemin shëndetësor, kanë arritur të fitojnë vendin e punës dhe t’u shërbejnë pacientëve, pas një sërë provimesh dhe kriteresh të vendosur më parë”. Pas këtyre deklaratave, reagoi Ministria e Shëndetësisë, e cila përmes një deklarate për shtyp theksoi se testimi nuk e cenon dhe nuk dëmton procesin e nisur tashmë prej pesë vitesh të edukimit në vazhdim. Po ashtu, disa ditë më vonë, ministri Beqaj deklaroi edhe një herë se testimi do të kryhet, ndërsa paralajmëroi se për mjekët dhe infermierët që do të refuzojnë të hyjnë në testim, do të ndërmerren masa penalizuese.

Testimi
Ndërkaq, më herët ministri Beqaj bëri me dije dhe disa nga detajet e zhvillimit të testimit kombëtar të bluzave të bardha. Sipas ministrit, ai do të ndahet në dy faza: e para, që do të përfshijë testimin për njohuritë bazë dhe faza e dytë, që do të jetë një testim praktik sipas profileve përkatëse. Në pjesën e parë, mjekët dhe infermierët do të pyeten kryesisht për etikën e zbatimit të profesionit apo çështje të korrupsionit, ndërsa në të dytën testimi do të përqendrohet në njohuritë specifike të fushës që ata mbulojnë. Në provim do të futen profesionistët e shëndetësisë të sistemit parësor dhe atij spitalor, ndërkohë që sipas ministrit, i gjithë procesi do të mbyllet në muajin mars. Sa u takon mjekëve të sistemit parësor, testimi do të fokusohet edhe te mënyra e zbatimit të sistemit të referimit, që është një nga problemet kryesore që has sot shëndetësia shqiptare.

/DRONI.al/