Shpëtim Gjika dënohet me 4 vjet burg

Ish-kryebashkiaku i Vlorës Shpëtim Gjika është dënuar sot me 4 vjet burg nga gjykata e qytetit bregdetar. Vendimi është dhënë gjatë ditës së sotme.
Pas vendimit për dënimin me burg, gjykata është shprehur se ai do të dënohet me kusht, që të bëjë 2 vite shërbim prove.
Prokuroria kishte kërkuar 9 vite burg për Gjikën dhe dënim për dy bashkëpunëtorë të tij.
Biznesmeni Artur Harxhi është dënuar me 4 vite burg, ndërsa Doriana Sulaj u shpall e pafajshme.

Pretenca e prokurorisë në 29 qershor 2017
Në përfundim të shqyrtimit gjyqësor të procedimit penal nr. 1264 të vitit 2014, Prokuroria pranë Gjykatës së Shkallës së parë Vlorë kërkoi:

-Dënimin e të pandehurit Shpëtim Gjika me 9 (nëntë) vite burgim, për kryerjen e veprave penale të parashikuara nga nenet 186/3 e 25, 248, 199/a/2 e 25 dhe 301 të Kodit Penal.

-Dënimin e të pandehurës Doriana Behari (Sulaj) me 6 (gjashtë) vite burgim, për kryerjen e veprave penale të parashikuara nga nenet 186/3 e 25, 248 dhe 199/a/2 e 25 të Kodit Penal.

-Dënimin e të pandehurit Artur Haxhi me 6 (gjashtë) vite burgim, për kryerjen e veprave penale të parashikuara nga nenet 186/2 dhe 199/a/2 e 25 të Kodit Penal.

-Konfiskimin dhe kalimin në favor të shtetit të produkteve të veprës penale e konkretisht:
a) Objekti godinë banimi dhe shërbime 3-8-10-11 kate dhe 1-kat nën tokë në lagjen “Hajro Çakërri” Vlorë (Objekti A), të ndërtuar nga subjekti ndërtues “Turi&M.Z.B” sh.p.k, ndaj të cilit është vendosur masa e sigurimit “sekuestro preventive” me vendimin gjyqësor nr. 66 datë 09/02/2015 të Gjykatës së Rrethit Gjyqësor Vlorë
b) Objekti godinë banimi dhe shërbime 3-8-10-11 kate dhe 1-kat nën tokë në lagjen “Hajro Çakërri” Vlorë (Objekti, të ndërtuar nga subjekti ndërtues “Turi&M.Z.B” sh.p.k, ndaj të cilit është vendosur masa e sigurimit “sekuestro preventive” me vendimin gjyqësor nr. 263 datë 15/04/2015 të Gjykatës së Rrethit Gjyqësor Vlorë.

/DRONI.al/