Biznesi amerikan: Shqipëria nën nivelin e Maqedonisë për thithjen e biznesit të huaj

Presidenti i Dhomës Amerikane të Tregtisë, Marc Crawford, deklaron se Shqipëria duhet të rishikojë politikën e taksave, për të mos humbur garën e investimeve me vendet e rajonit. Ndaj, në paketën e re fiskale, Dhoma Amerikane e Tregtisë i ka kërkuar qeverisë të ulë veçanërisht dy taksa, tatimin mbi fitimin dhe tatimin mbi të ardhurat. Sipas kreut të Dhomës Amerikane, lehtësimi i taksave, përveçse do të sillte më shumë investime, do të ulte edhe informalitetin në ekonomi

Presidenti i Dhomës Amerikane të Tregtisë, Marc Crawford, deklaron se Shqipëria duhet të rishikojë politikën e taksave, për të mos humbur garën e investimeve me vendet e rajonit.
“Nëse shikoni Maqedoninë, ata janë shumë agresivë në thirrjen ndaj investitorëve, me taksa të ulëta dhe me subvencione. Ata kanë marrë së fundmi një investim, që është miratuar nga një prej kompanive më të mëdha në Amerikë, ‘Leart’, pas të cilit parashikohen të punësohen 2 mijë njerëz në Tetovë dhe disa qindra në Gostivar, të dyja këto zona shqipfolëse. Kështu që, përse të mos vinin këtu?”, tha Presidenti i “AmCham Albania”, Marc Crawford.
Sipas tij, pjesa dërrmuese e investimeve të huaja në Shqipëri janë në banka apo pasuri natyrore, çka tregon se vendi nuk është konkurrues për të thithur kapitalin e huaj.
“Nëse shohim se sa shumë kompani prodhimi, si ‘Leart’ që kanë shkuar atje për prodhimin e veshjeve të sediljeve të makinës, e sa kemi këtu në Shqipëri, atëherë e kuptojmë shumë mirë se sa konkurruese është Shqipëria”, shprehet më tej Marc Crawford.
Ndaj, në paketën e re fiskale, Dhoma Amerikane e Tregtisë i ka kërkuar qeverisë të ulë veçanërisht dy taksa.
“Ne jemi duke diskutuar për tatimin mbi fitimin dhe tatimin mbi të ardhurat, ndër më kryesoret që duhen ulur”, sqaron Crawford.
Sipas kreut të Dhomës Amerikane, lehtësimi i taksave, përveçse do të sillte më shumë investime, do të ulte edhe informalitetin në ekonomi.

/DRONI.al/