Përdorimi i drogës në vendin tonë është një problem shumë serioz. Sipas të dhënave të shërbimit të Toksikologjisë në qendrën spitalore “Nënë Tereza”, numri i pacientëve intravenozë është në rritje; deri më tani këta përdorues përbëjnë 60 për qind të totalit të përdoruesve. Gjatë një viti regjistrohen rreth 250 overdoza dhe gati 10 persona humbasin jetën nga overdoza.
Sipas një studimi të fundit të kryer në vitin 2014, në vendin tonë prevalenca e përdorimit të drogave ilegale përgjatë gjithë jetës për grupmoshën 15-64 vjeç është kanabisi (11.6 %), kokaina (4.7 %), ekstasi 1 %, heroina (0.7 %), amfetaminat (0.4 %) dhe LSD (0.1 %). Ky studim tregon se të rinjtë e moshës 15-34 vjeç janë përdoruesit më të shumtë të drogave ilegale në vendin tonë. Po ashtu, sipas studimit, numri i përdorimit të substancave ilegale tek adultët në vendin tonë, është 8 deri në 10 herë më e lartë te meshkujt sesa te femrat. Por sipas të dhënave statistikore të shefit të pavijonit të Toksikologjisë, Zihni Sulaj, këto vitet e fundit është shtuar shumë numri i përdoruesve të kokainës.
Në shërbimin e Toksikologjisë shtrohen çdo vit 400 vetë, rreth 1.600 të tjerë paraqiten në Urgjencë dhe rreth 250 persona në vit bëjnë overdozë. Ky shqetësim është ngritur edhe nga specialisti i ISHP-së Alban Ylli, sipas të cilit, nëse dikur ka qenë problem kanabisi, tashmë në shqetësim janë kthyer dhe drogat e forta.
Shifrat
200 mijë persona kanë eksperimentuar kanabisin.
10 deri në 20 mijë persona kanë eksperimentuar kokainën.
6 deri në 7 mijë persona përdorues problematikë, që vuajnë dhe kanë varësi.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
