Ish-presidenti i Republikës, Rexhep Meidani, kërkon nga kryetari i Partisë Socialiste që të respektojë statutin e partisë.
“Nuk është respektuar statuti aktual në funksionimin institucional të partisë, që po të ‘ekstrapolohet’ shpreh një deformim në konceptim, një përafrim jodemokratik në ligjësimin institucional. Pavarësisht deklaratave të kryetarit (me mandat të përfunduar sipas statutit) dhe sofizmave të tij me modelin laburist, aq më keq të imitimeve përdredhëse të ‘ideologëve’ dhe servilëve të çdo kryetari radhe; përgjigja është fare e thjeshtë – duhej të ishte respektuar statuti. Ose duhej të miratohej me shpejtësi një statut tjetër, në pasqyrim të situatës konkrete apo merakut personal. Këtë do të bënte çdo parti me udhëheqje dhe forume dinjitoze!”, shpreh Meidani në një intervistë ekskluzive për gazetën “Panorama”
Nga ana tjetër, Meidani shpreh habi se si senatorët e PS nuk e kanë kërkuar zbatimin e statutit.
“Çuditërisht përdoret një argument që nuk është fare argument, në kuadër të statutit aktual të partisë. Dhe, megjithatë, është heshtur ose janë fërkuar sytë! Përfshirë dhe të ashtuquajturit ‘senatorë të partisë’”.
Meidani: Rama të lërë sofizmat me laburistë, të respektojë ose të ndryshojë Statutin
