Në samitin e Vjenës, liderët evropianë do t’i kërkojnë kryeministrit të Kosovës Isa Mustafa dhe atij ët Shqipërisë, Edi Rama, arsyet e ikjes së shqiptarëve në BE.
Austria do të jetë mikpritëse e takimit të dytë vjetor të samitit për Ballkanin Perëndimor të nisur si “procesi i Berlinit” me iniciativën e kancelares gjermane Angela Merkel dhe kolegut të saj nga Austria, Faymann, shkruan sot “Koha Ditore”.
Qeveritë e Gjermanisë dhe Austrisë, një kohë të gjatë janë duke punuar në përgatitjen e këtij takimi dhe numri i madh i ngjarjeve, ku përfshihet dhe eksodi më i fundit i qytetarëve nga Ballkani Perëndimor, drejt Be-së, dhe i takimeve gjatë dy ditëve të ardhshme në Vjenë dëshmon rëndësinë që i jepet këtij samiti.
Ky samit për Ballkanin Perëndimor në kuadër të Procesit të Berlinit do të mbledhë të gjithë liderët e Ballkanit, kryeministrat, ministrat e jashtëm, ata të integrimeve evropiane, të energjisë dhe ministra të tjerë evropianë, duke përfshirë kancelaren gjermane Merkel, atë të Austrisë, Faymann, të Italisë, Renzi, të Kroacisë, Milanoviq dhe të Sllovenisë, Cerar. Do të marrin pjesë edhe përfaqësuesja e lartë e BE-së Mogherini, komisari Hahn dhe shumë zyrtarë të tjerë.
Zgjidhja e kontesteve bilaterale, projektet e infrastrukturës për lidhje më të mirë, lufta kundër ekstremizmit, problemi i migracionit priten të jenë temat kryesore të këtij samiti.
Rama dhe Mustafa llogaridhënie në Vjenë për azilin e shqiptarëve në BE
