PS u vu në mbrojtje të Metës sot lidhur me skandalin e CEZ, reagim i cili ka munguar në debatet e tjera në parlament. Deputeti i Partisë Socialiste, Taulant Balla tha se në lidhje me çështjen e CEZ, “pazaret” i ka prishur Sali Berisha. Ai shkoi edhe më tej, kur tha se jo vetëm Berisha por edhe familja e tij është e përfshirë në këtë çështje, se Kastriot Ismailaj i DIA-s hynte e dilte në zyrën e Berishës, e po ashtu ka qëndruar në të njëjtin hotel me Shkëlzen Berishën, djalin e ish-kryeministrit, në dy raste në çeki dhe Vjenë.
“Sa herë ka hyrë Kastriot Ismailaj në zyrën e Berishës? Kastrioti dhe një Rebeka? Kur të akuzosh kundërshtarin politik, Metën se gjoja paska qenë në Pragë ti Sali si ka mundësi se në hotel Mandarin në Pragë ka qenë edhe Shkëlzeni edhe Rebeka edhe Ismailaj. Sigurisht që kjo i takon institucioneve të drejtësisë ta hetojnë, por e njëjta situatë është përsëritur edhe në një hotel në Vjenë”, tha ai.
Taulant Balla ka humbur disa gjyqe për akuzat që ka ngritur ndaj fëmijëve të Berishës.
Akuzat ndaj Metës, Balla i quajti sulm, ndërsa për të gjithë historinë tha se është gatuar në kuzhinën e SHQUP-it.
“Sulmi i mirëkoordinuar mundohet që të hedhë baltë në radhë të parë mbi kryetarin e Kuvendit, i cili nuk ka asnjë lloj lidhje me këtë çështje. Kjo maxhorancë nuk bie nga asnjë lloj historie që gatuhet në kuzhinën e SHQUP. Hetimi është duke u bërë në prokurorinë e këtij vendi, po të ishte i pari juaj këtu do ta pyesja a je ti Sali i gatshëm të shkosh në Prokurori? Je në dijeni të një krimi? Shko që nesër në Prokurori. Pse nuk i thoni shko që nesër dhe dëshmo? Ky hetim sapo ka filluar, sepse kur të hetohen kompanitë e tjera që kanë thithur të ardhura ju sigurisht do keni dhimbjet e barkut e kokës dhimbje të tjera”, tha deputeti Balla.
