Basha: PD në krah të kërkesave të qytetarëve për të rrëzuar qeverinë

Kreu i Partisë Demokratike, Lulzim Basha, ka mbështetur protestën e tregtarëve sot, ndërsa ka bërë thirrje gjithë shqiptarëve për tu bashkuar në protesta për rrëzimin e qeverisë. Ai ka akuzuar gjithashtu kryeministrin Edi Rama dhe kreun e Kuvendit, Ilir Meta, se i janë sulur pasurisë së vendit, duke mos u shqetësuar për protestat e qytetarëve.
Në një deklaratë për mediat pas takimit Rama-Meta të zhvilluar ditën e sotme, Basha tha se qeveria shqiptare ka humbur kontaktet me realitetin. Sipas tij, Rama e Meta shqetësohen vetëm për “karriget e tyre”, ndërsa renditi disa nga problematikat kryesore me të cilat përballen sot sipas tij shqiptarët.
“Protestën e tregtarëve në Tiranë e çdo rreth të vendin PD e ka mbështetur dhe e mbështetet në të gjitha format e mënyrat që një parti politike mund ta bëjë këtë. Është një protestë e drejtë për bukën e fëmijëve të tyre. Është e vetmja formë që u ka mbetur për të ngritur zëri e tyre. Por Rama e Meta nuk e kanë parë këtë për këtë se kanë lëvizur sa te njëra vilë qeveritare të tjera.
73 mijë persona kanë humbur vendet e punë në shtator tetor. Kjo ka ndodhur për shkak të arbitraritetit të Ramës e Metës. Ne këtë kohë që këta takohen, me gjasë dhjetëra të tjerë kanë humbur vendet e punës. Ndërsa këta luftojnë për vendet e tyre të punës, kanë shqetësim kryesor të mbrojnë, Beqajt, Tahirët, Kokëdhimët, Kodhelët.
Kemi 100 mijë azilkërkues, 200 mijë aplikues për lotarinë amerikane. Të gjithë duan të ikin. Në vend të reflektojnë e të marrin përgjegjësitë, e të mendojnë se janë ata që me politikat e tyre, rritjen e taksave, gjobat, hajdutërinë, janë shkaktarë të kësaj gjendje; ata turren t’u mbyllin gojën shqiptarëve. Por këtë nuk mund ta bëjnë kurrë.
PD nuk do tërhiqet nga kërkesa e qytetarëve, për t’u bërë gati për të rrëzuar qeverinë e qyqarëve Rama-Meta”, tha Basha.

Prononcim i plot për mediat i  kryetarit të Partisë Demokratike, Lulzim Basha

Pyetje: Kryeministri Rama ka deklaruar se tregtarët po përdoren, në fakt cili është qëndrimi i Partisë Demokratike lidhur me këtë protestë sot dhe lidhur me shifrat e papunësisë, siç raportojnë mediat kanë shkuar 73 mijë?
Lulzim Basha: Së pari dua t’ju them se protestën e tregtarëve në Tiranë, sikundër në Fier, Korçë dhe Shkodër, Partia Demokratike e ka mbështetur dhe e mbështet me të gjitha format dhe mënyrat që një parti politike mund ta bëjë këtë. E mbështes sepse është një protestë e drejtë e njerëzve që po detyrohen për bukën e gojës së fëmijëve të tyre, t’i kthehen mjetit të fundit demokratik që është protesta, ngritja e zërit për të drejtën e tyre.
Problemi është që Edi Rama dhe Ilir Meta nuk e shohin protestën, nuk kanë parë sot, se gjithë këto ditë kanë bërë ecejaket sa nga zyra e tyre te zyra e Mehmet Shehut, se kanë të tjera shqetësime. 73 mijë sipas statistikave zyrtare të Drejtorisë së Tatimeve kanë humbur vendet e punës vetëm muajt shtator –tetor. 73 mijë shqiptarë, 73 mijë familje kanë humbur, të punësuar, me shumë gjasa të vetëpunësuar bukën e gojës për shkak të gjobave, për shkak të taksave të rritura, për shkak të korrupsionit, për shkak të arbitraritetit të Edi Ramës dhe Ilir Metës.
Këto nuk i shohin sepse ndërkohë që ndodhin këto, ndërkohë që 73 mijë që kanë humbur vendet e punës në atë orë, në këto orë me siguri të tjerë kanë humbur vendet e punës. Këta kanë një preokupim të ruajnë vendet e tyre të punës, të ruajnë garnizonet e hajdutëve të Edi Ramës dhe Ilir Metës që i janë vërsulur pasurive publike. Të ruajnë Damianët, Gjiknurët, Haxhinastot, Tahirët, Beqët, Kodhelët, Kokëdhimët. Ky është shqetësimi kryesor i Edi Ramës dhe Ilir Metës.
Kjo është pra një qeveri që ka humbur çdo lidhje me realitetin. Kjo qeveri është arsyeja që në vetëm dy muaj kemi 73 mijë të papunë sepse në vetëm në një vit kemi 100 mijë azilkërkues në Europë, 200 mijë aplikime për Lotarinë Amerikane, i bie 600 mijë shqiptarë, po ti marrim nga tre veta për familje.
Në vend që të reflektojnë, në vend që të marrin përgjegjësitë, në vend që të kuptojnë që janë ata me politikën e tyre, me korrupsionin e tyre, me rritjen e taksave, me gjobat, me hajdutërinë, shkaktarët e kësaj gjendjeje, ka një dhe vetëm një preokupim: Si t’i mbyllin gojën qytetarëve, si t’i mbyllin gojën opozitës, si t’i mbyllin gojën mediave. Kësaj nuk ka për t’ia arritur kurrë, as kokoshi poturembushur dhe as ortaku i tij krenar dhe i qetë me pazarin e rinovuar.
Pazaret, sikundër opozita, Partia Demokratike dhe Lulzim Basha nuk do të tërhiqen nga kërkesat e qytetarëve shqiptarë të bëhemi gati dhe të rrëzojmë me gjithë mjetet e ligjshme demokratike qeverinë e kusarëve Rama-Meta.
Faleminderit !

/DRONI.al/